Een nieu devoot geestelijck lietboeck

[p. 3]

Voor-reden.

Aen die Eersame Ouerheyt van Roosendael,

En die goede Gemeynte int Generael,

Van die desolate Kercke tot Roosendale.
Aen u eersame Ouerheyt altemale,
Die de vrijheyt van Roosendael altemale,
Aen u goede ghemeijnte int generale,
Heb ick wt liefden dit boecxken ghedediceert,
Dat ick ter eeren Godts heb gecomponeert,
En tot stichtinge van alle gode menschen claer,
Ick bid u ootmoedelijck dat ghyt accepteert,
Van my uwen Coster onweerdich voorwaer,
Om dat ick ben een ingheboren eerbaer,
Van die afghebrande Vrijheyt Roosendael soet,
Soo bemin ick u alle salicheyt gheluck en voorspoet,
Godt de Fonteyne en oorspronck van allen goet,
Moet u verlichten met zijn gratie ghemeene,
En oock beschermen bewaren in zijn behoet,
Dat ghy meucht blyuen woonen vreetsamich by eene,
Dit wensch ick u inwoenders van Roosendael reene.

Mijn eerweedighe Heeren zeer hooch ghepresen,
En goede ghemeynte die ick dienst moet bewijsen,
Wilt dit boecxken gebruycken doorsoecken en lesen,
Het sal u droenighe Gheesten met vreuchden spijsen,
Want gheestelijcke liekens doen blijschap rijsen,
In die herten die met droefheden zijn bevaen,
Dus wilt in u droefheyt den Heere prijsen,
Met soete lofsangen na Jacobus vermaen,
Den booch en mach altoos niet ghespannen staen,
Men mach wel somtijts wat vreuchden pleghen,
Met geschickte maniere en eerbaerheyt saen:
Als de plaetse en tijt bequaem is ghelegen,
Gheestelijcke liedekens die hereen bewegen,
Tot soete deuotie in alle plecken,

[p. 4]

 

Die de natuere der menschen is meest gheneghen,

 

Met hemelsche soeticheyt tot Godt te trecken:

 

Ick hoop het sal die ionghe dochters verwecken,

 

Haer maechdelijcke reynicheyt wel te bewaren,

 

Om te dienen den Bruydegom om reyn sonder vlecken,

 

Den Heere en Coninck van die Engelsche scharen:

 

Met gheestelijcke liedekens machmen verclaren,

 

Godts lof en glorie tot allen daghen,

 

Fantasye, ghedachten, die t’herte beswaren,

 

Canmen door gheestelijcke liedekens veriaghen:

 

Want als Dauid speelden, tot Sauwels behaghen,

 

Gheestelijcke liedekens op die herpe zijn,

 

Den Duyuel en const dat niet langher verdraghen,

 

Hy heeft Sauwel verlaten op dat termijn,

 

Dauid vermaent ons dickmael in zijn Psalmen fijn,

 

Dat wy Godt souden singhen lofsanghen excelent,

 

Singt den Heere in uwer herten met blijden schijn,

 

Na Paulus beschrijuen seer pertinent,

 

Hierom heb ick dit boecxken laten comen in prent,

 

Dat ick u dedicere wt liefden saen,

 

Goede Heeren en gemeynte van Roosendael ient,

 

Tot uwen dienst begheer ick altoos bereyt te staen,

 

Wilt dese cleyne gifte in dancke ontfaen,

 

Ick hoope het sal u wesen seer aengename,

 

Dat ick dit tot u eer en faueur heb ghedaen,

 

Eerwerdighe Heeren en ghemeynte eersame,

 

Ick wensch u salicheyt aen siel en lichame,

 

Mijn lieue broeders en susters verheuen,

 

Leeft sober Godtvruchtich in deuchden bequame,

 

Dat ghy namaels meucht comen int eewich leuen,

 

Dit wil u Godt door zijn Heylighe goetheyt gheuen.

A M E N.