|
| |
Dit Refereyn machmen prononceren op een gheestelijcke Bruyloft, tot leeringe van een gheestelijcke Dochter.
GHelijck als een Lelie onder den doren,
Alsoo is mijn vriendinne seyt den bruydegom net,
Onder die dochteren van Jerusalem vercoren,
Hierom ghy bruyt Christi wilt neerstich aenhooren,
En op die condicie van een Lelie let,
Aensiet hoe cieratelijck datse is geset,
En sy heeft gemeynlijck ses schoone blaeren,
Sy beteeckent suyuerheyt sonder smet.
Diemen seer neerstelijck behoort te bewaren,
Al ist dat die dorens ontrent haer vergaren,
Men siet haer schoonheyt niet corumperen,
Alsoo wildy v onder die maechden paren,
Ghy moet dese suyverheyt obserueren,
| |
| |
Dan sult ghy den nieuwen sanck intoneren,
Die niemant en mach singhen in s’hemels troone,
Dan die in desen staet persevereren,
Ghelijck als een Lelie weest suyuer en schoone.
Een Lelie die is oock ieuchdich en groene,
Eenen soeten reucke die wt haer vloeyt,
Alsoo is die Suyuerheyt der maechden coene,
Altoos ieuchdich fraey int faeysoene,
Want sy wordt met den Hemelschen dauwe bespoeyt,
Haren soeten reucke overvloedich groeyt,
Dat hy daer vervult het Het huys des Heeren,
Dat is haer deuchdelijcke fame die schoone bloeyt,
En inder eewicheyt niet en sal keeren,
Daerom ghy bruyt Christi hier aen moechdy leeren,
Hoe dat ghy in suyverheyt behoort te leuen,
En Jesum den Bruydegom gestadich eeren,
Daer ghy in het getal te zijn geschreuen,
Die het lam Gods eeren metten nieuwen toone?
Soo moet al dat besmet van v zijn verdreuen,
Ghelijck als een Lelie weest suyuer en schoone.
Aensiet die Lelie dees schoon creatuere,
Sy is wit en blinckende met schoonheyt verciert,
Alsoo blinckt die suyverheyt der maechden puere
Die hier haer vleesch en quade natuere,
Hebben wyselijck na den Gheest bestiert,
Haer feesten worden hier opder aerden geviert,
Die nu inden Hemel zijn in vreuchden voorwaer,
Sy waren in goede seden zeer wel gemaniert,
Een Exempel en Spiegel van deuchden eerbaer,
Och hoe salich is die suyuer onbevleckte schaer,
Die het Lammeken mogen volgen waer dat het gaet,
Door alle die Chooren der Engelen claer,
Sijnen naem in haer voorhoofden geschreuen staet,
Daerom ghy bruyt Christi bemint metter daet,
Jesum uwen lieuen Bruydegom idoone,
Hy sal v Croonen vercieren met Hemels ciraet,
Ghelijck alle een Lelie weest suyuer en schoone,
| |
Prince.
Soo lange als een Lelie noch is gesloten,
| |
| |
Soo en sietmen daer gheen perfeckte schoonheyt aen,
Maer als die Sonne in haer is gevloten,
En met haer stralen en wermte doorschoten,
Dan sietmen haer perfeckte schoonheyt ontfaen,
Te weten die graenkens die binnen haer staen,
Ontfangen colore als gout van virtuyten,
Daermen die vierige liefde by mach verstaen,
Daer alle deuchden wt moeten spruyten,
Daerom ghy bruyt Christi wilt v herte ontsluyten,
Die Sonne der rechtveerdicheyt sal in v dalen,
V seluen moet ghy steruen en gaen te buyten,
Dan sult ghy gevoelen haer werme stralen,
En v bruydegoms liefde met liefde betalen,
Die v sal gheuen der Maechden croone,
Hier bouen in die Hemelsche salen,
Ghelijck als een Lelie weest suyver en schoone.
|
|
Auteursrechtvrij