Het II. Deel vanden speel-hof der liefde Godts
(1666)–Zuster vanden Kerchove–
AuteursrechtvrijStemme: Que je suis travaillé.
FRanciscus goedertier,
In veelderley manier,
Heeft sathanas ghebonden,
Door sijn devoot ghebedt:
En vijf bloedighe wonden,
Heeft hem in't leeghe dat gheset,
Heeft hem in't leeghe dat gheset,
Heeft hem in't leeghe dat gheset.
| |
[pagina 93]
| |
O kloecken Capiteyn!
Cieraet des wereldts pleyn,
Claer Son die ons al lichte.
Dry Ordens met ootmoet,
Ghy in dees wereldt stichte;
Daer-men looft 't alder-hooghste Goet,
Maer-men looft &c. bis.
O Coningh! machtigh Heer,
Die door u werck, en leer,
Exempel hebt ghegheven
Aen die in u paleys,
In uwe Ordens leven;
Ghy bracht op aerderijck den peys,
Ghy bracht op &c. bis.
Siet hoe de Lely bloeyt,
Hoe daer de liefde groeyt,
En hoe sy ras verdrijven,
Dat hun tot sonden treckt;
Reyn, puer, onnoosel blijven,
Suyver als Enghels onbevlect,
Suyver als &c. bis.
Gheen aerbeydt daer vermoeyt,
't Ghebodt bly, onvernoeyt,
Sietmen elck ras volbringhen,
Met liefde, sonder klacht,
Ghewilligh sonder dwinghen,
Wort de ghehoorsaemheyt volbracht,
Wort de &c. bis.
Den rijckdom die beswaert,
En soo veel sonden baert,
Moet daer ras henen vluchten,
D'aermoede naeckt, en bloot,
Blijmoedigh sonder duchten,
Willen my houden totter doot,
Willen my &c. bis.
D'ootmoedigheyt gheplant,
Blijft daer in eenen stant,
Nature sy al temmen,
Elck sich verniet, verneert,
Noyt willen sy op-klemmen,
D'ootmoedigheyt daer triumpheert,
D'ootmoedigheyt daer &c. bis.
| |
[pagina 94]
| |
Standvastigh tot den ent,
Elck sich dar oock ghewent,
Het lichaem te castijden,
Sachtmoedigh ende stil,
Omhelsen daer het lijden,
Verloochent wordt den eyghen wil,
Verloochent wordt &c. bis.
Franciscus u zy lof,
Besproeyt heel uwen Hof,
Hier ende t'allen canten;
By Godt ghy veel vermeught,
Maeckt dat al uwe planten,
Groeyen, en bloeyen inde deught,
Groeyen, en &c. bis.
|
|