21. Origen di drama
Drama ta masha biew. Den tempu di griegonan el a forma for di ditirambo (kansion di honor na Dioniso, dios di biña). Gradwalmente e ditirambo a desaroya i bira un dialogo entre e kantor i e koro. Despwes nan a agrega un kantor mas; ku tempu nan a owmenta e kantidad di kantor. Trabow di e koro a bin para los di e dialogo. Den lírika elevá e koro tabata kanta e impreshon ku e drama a hasi riba e miradó ideal.
Despwes di a muri den edat media, drama a nase di nobo. I meskos ku den tempu di griego i romanonan e tabata kana parew ku solemnidad religioso. Su desaroyo a sigi for di liturgia katóliko. Pesei el a haña nomber di drama litúrgiko.
Nan tabata presenta istoria di evangelio, den misa, riba Biernè Santu, Pasku di Resurekshon i Pasku di Nasementu. Gradwalmente nan a sinti deseo di ekstende e presentashon. Ma komo a la largu e ‘komedia’ a bira demasiadu grandi pa present'e den misa, nan a bin hunga e drama den santana o na marshe. Un resto di tal sorto di drama eklesiástiko a keda eksisti na Oberammergau.
Nos por klasifika e drama dje tempu ei den:
| 1. | misterio, ku tin komo tema un parti di Biblia. |
| 2. | Drama di milagro, ku ta presenta un o mas milagro di Maria o otro santu. Maria di Malpais (Mariken van Nieumeghen) tabata presenta den varios bario di Korsow algun aña pasá. |
Auteursrechtelijk beschermd