Arte di palabra

29. Sinónimo

Homónimo ta palabra ku e mesun zonidu pero ku nifikashon diferente. P.e. rèndu = aparato pa sera porta

rèndu = e verbo igwal na parandiá.

Pero sinónimo ta palabra ku tin mas o menos e mesun nifikashon. P.e.: loko, kens, chocho, pasá.

Eksistensha di sinónimo ta un ventaha grandi den idioma. Esun ku mester tene un diskurso o lektura sa ki balor nan tin. Den kombersashon di tur dia nan no ta tantu nesesario. Si un hende papia kla, ta basta. Pero ora nos ta buta nos pensamentu riba papel, nos ta ripara e balor di sinónimo. Pasobra sinónimo ta trese variashon den

[p. 32]

nos estilo. Pa un eskritor ta di masha importansha si e uza sinónimo. Tuma nota, por ehempel, kon un persona ta ripiti e mesun palabra ‘kos’ mil i un be den loke e ta bisa. Bo ta fada di tende e mesun zonidu, e mesun palabra.

Mira ki agradabel ta ora bo uza: hopi be.. konstantemente

pronto.. djis aki

nunka.. hamas.

Esakinan ta sinónimo ku ta nifika práktikamente meskos. Ma nos mester tene kwidow ora dos sinónimo su nifikashon ta un poko mas leuw for di otro.

Si un persona bisa: ‘Awe m'a kumpra masbangu bibitu’, nos sa mesora ku e no sa e diferensha entre ‘bibu’ i ‘bibitu’.

Bon uzo di sinónimo ta siña nos distingi balor di palabra i papia korektamente.