Arte di palabra

31. Diferente ambiente di idioma

Tin be ta parse ku tur nos hendenan ta papia e mesun idioma. Esensialmente esei ta berdad. Pero si nos paga tinu bon, nos lo ripara ku tin diferensha den loke hendenan di diferente rango, pwesto, fishi, edad o lugá ta papia.

[p. 33]

Un mesla ta papia di profil; un sapaté di lapiston.

E palabra ‘bululú’. a origina den un famia, ku nifikashon di ‘beheit, bochincha’. Un ‘borkanchi’ (pida butishi kibrá pa mula kuchú ulandes) bo no ta tende den stad; ‘djogodó’ (un mangasina chiki pa warda herment) ta di kunuku.

Hudiwnan a mantene varios palabra hebreo den e idioma papiamentu ku nan a asepta komo di nan.

Mucha chikitu ta bisa ‘nana’ pa drumi, ñam-ñam’ pa kome.

Tin be e mesun palabra tin nifikashon diferente den boka di diferente persona. Pa un sapaté ‘swela’ ta kweru pa traha sóle; pa un mama di kas ta e flur ku e tin ku bari. Un mesla ta uza ‘pènchi’ pa marka terenu; un labadera ta uza ‘pènchi’ pa kologa paña na kabuya.