Arte di palabra

37. Dunamentu di nomber

Tur hende, bestia, máta i kos tin nan nomber. No ta posibel pa trata riba algu sin ku nos sa kon yam'e. Semper lo tabatin un motibu pa duna kada kos su nomber. Pero ta difisil o kasi imposibel pa haña sa e origen.

[p. 35]

Aunke ta posibel pa nos bisa algu tokante dunamentu di nomber. Tin algun faktor ku semper a influensha nomber di un kos:

a.	e material ta yuda pa duna nomber. P.e. un heru di strika; un glas di awa, un bleki di kumínda. Pero ku tempu nos ta perde noshon dje material. Di moda ku nos ta papia di un glas di plastik, un bleki di koper.
b.	zonidu tambe por ta origen di un nomber: Un owto biew i mankaron a bira un ròkòtòko; hopi boroto di papiamentu a bira bululú. Sorto di palabra asina ei nos ta yama onomatopeia (imitashon di zonidu).
c.	koló tambe por bira un nomber: berdura, kòrá (uza komo sustantivo pa un persona kabei di ruku o poko ruán).
d.	kwalidad ta bira nomber: Un gordo, un loko.
e.	fabrikante ta duna su artikulo un nomber: un kamera di saka portret ta kodak; un refrigeradora ta un frizjidèr.
f.	ta sobra nos e humorismo di nos pweblo den dunamentu di nomber: un slof hapones di alestik ta un start-sali, un kadena largu i pisá di oro ta un kadena di ankra barku, un sombré di aros ku nan tabata bende pa sinku riá a bira un sinkúria, un bachi ku sples patras ta un bachi di kòrta puya. Den ultimo tempu un karson bell bottom ta un karson di bari kaya.