Arte di palabra

50. Tres aksent di ritmo

Si metro ta únikamente un fórma fiho ku un poesia por tin o lag'e tin, ritmo en kambio, ta alma di un poesia. Tin be metro ta zona forsá, pero ritmo ta e moveshon natural di un frase.

E tres aksentnan di ritmo ta:

a.	aksent temporal (variashon di purá i pokopoko)
b.	aksent melódiko (variashon di haltu i abow)
c.	aksent dinámiko (variashon di fwerte i debil).

Pesei nos por bisa, ademas di loke tin bisá den kapitulo 48, ku ritmo ta e moveshon natural di un frase, ku ta hasí ekspresivo pa medio dje variashon di intensidad temporal, melódiko i dinámiko.

Esun ku tin oido pa poesia por tende stem dje poeta den e ritmo di su poema.

Ta manera nos por tende Nicolas Piña, kasi gritando, den su poesia ‘Mi ruman’:

Bin seka mi,
mi ta sklama tur dia
anshá
p'e ultimo alegria
di por mirabo
i pordonabo....

Si nos ke mira e balor di ritmo, anto lo ta bon pa kompará:

Kore, mucha, kore,
kwe e barbulètè,

[p. 51]

 

piki un flor di mondi,

 

kore djis pa kore.... (di Philomena Wong)

ku esun di Rene de Rooy:

Ai, kon m'a stima den mi añanan pasá,
kon tantu kos ta'tin mi tur bruá.
Awor ku mi pashonnan ta bai bandonami,
poko-poko mi ta weta kla.

Esun di promé ta kanta i bula ku alegria, mientras e di dos ta lastra bai, pisá i meditando.

Tin owtor ku a trata na ekspresa nan sintimentu den ritmo i zonidu so. Tal sorto di poesia puru nos por apresia ku nos oido, pasobra e ta bira un total di zonidu.

Kanta, kweru kayente, kanta
kweru, kanta eh pa mi lanta.... (E. Juliana)

Asonansia i akonsonansia

Si únikamente e vokalnan dje sílabanan aksentwá ta rima, i no e konsonantenan promé o despwes, nos ta yama esei asonansia.

P.e.: mira i bisa.

Den kaso ku e konsonantenan ta rima, esei ta akonsonansia.

P.e.: belin i balon.

Poesia ta diferente for di prosa, no únikamente pasobra e sa tin metro, pero pasobra e tin siertu karakter espesial di dikshon i pensamentu.

E tema di mas prosáiko por ta ekspresa na e idioma di mas prosáiko i sinembargo kontene un metro perfekto. E metro no ta hasi ni e tema ni e idioma poétiko.

Den kaso ku un persona traha un ‘rima barata’, keriendo ku ta poesia el a produsi, nos ta mira e kos ei sosode.

P.e.: Mi tin un kas di tabla ku betòn,

su flur ta bon trahá, e tin plafòn.