Arte di palabra

51. Dikshon poetiko

Algun di e karakterístikanan espesial ta lo sigiente:

1.	Uso di palabra arkaiko o menos komun.
	P.e.: bo ta un kurnú, muhe riba bo mes.... (Daal)
	Poesia no sa preokupa semper ku kambio den idioma.
	I na mes momentu e ta gusta distingi for di prosa.

[p. 52]

	Ta pesei hopi be e no ta uza palabra komun, manteniendo palabra ku ya a bai fo'i moda. Aunke den poesia moderno un poeta ta ekspresa su mes ku palabra simpel i kla.
2.	Omishon di palabra.
	‘den pleitunan di rasa’
	den: Ken ta mas blanku
	i rabiamentu pa plaka.... (Martinus)
	Sigun regla gramatikal e mester a skibi ‘den e pleitunan’.
3.	Kambio di e orden regular di palabra.
	‘Un straño amor, nasé no mas ku ayera’ (de Rooy)
	Nos lo bisa: Un amor straño. E adhetivo lo mester tabata tras di e sustantivo.
4.	Uso di partisipio pa parti di un frase,
	‘ni e nomber ku m'a forsa pronunsia,
	muriendo
	den final di mi rosea’ (Jesurun).
	‘muriendo’ ta na luga di ‘mientras mi ta muri’.
5.	Uso di adorno epitétiko, ku, bon mirá, no ta nesesario pa duna splikashon. (Epíteto: adhetivo ku ta ekspresa kalidad o atributo).
	‘i su luga ta henteramente bandona
	manera un fiesta ku a kaba marduga’ (Martina)
	Por elimina ‘bandona’ o ‘henteramente bandona’,
	sin ku nifikashon di e frasa kambia.
6.	Mas uso di idioma figurative.
	(Esaki nos a trata den kapitulo 41).