Bartol, sali for di haf aki ku marduga grandi. Awor aki ta boto di motor ta manda, pero prome aja ta na rema nos mester a hala. Diesdos homber mester a bua un kanoa grandi. Seis kada banda. Sigun nos ta bua, nos ta kanta. Esei ta pa duna e kurpa poko brio. Anto kada dos ora nos ta sosega un ratu, pa kada homber dal un mushi di rom pa kenta su ardunan. Di aki pa Klein Corsou sa tuma nos mas o menos seis ora’.
‘Ta basta rema’, m'a observa.
‘Pero bo ta kustumbra. Korda bon ku e tempu ei nos tabata hoben. Kestion ku tin, ora nos jega Klein Corsou, nos ta sosega basta ratu. Anto despwes di esei nos ta kuminsa piska. E botonan ku a jega un dia prome ta bolbe Corsou ku loke nos a piska. Asina nos tabata kambia otro’.
‘I bo por a mira e luga kaminda nan a dera Commodore Murray, e Ingles?’
‘No. Nunka. M'a tende un kos asina, ku hopi tempu pasá nan a dera un ofishal grandi ei riba. Pero un otro kos si mi ke konta. Un kos masha stranjo ku a pasami ei riba’. Pol a buta su trai na swela, sende su kachimba, grawata patras di su kabes i kuminsa su historia.
‘Un dia nos tabata riba Klein Corsou. E anochi ei nos a kaba di tira poko awa di plaja na stoma. I despwes ku nos a sinta kombersa, nos a bai drumi den e kasita ku prome aja tabatin pará ei riba. Feli, e ju di Dalia di Ma Tensha, tabata drumi ronka banda di mi. Esei mi ta korda kla. Nochi tabata bunita. Tur na strea. No tabatin ni un punt'i nubia.
E bentana parti pariba tabata habrí, di moda ku mi por a mira e faro ku tabata drei i tira su lus riba tera i riba laman.
Sigun mi tabata drumi pechu ariba, pensando riba mi kasá ku mi junan na Corsou, m'a tende un muhe ta jora. Pero jora masha tristu. E kos ei a stranjami masha, pasobra nunka mi no a mira un muhe ei riba. Prome m'a kere ku ta spiritu. Pero e joramentu tabata zona muchu duru. Spiritu su jorá ta mas lastimoso.
M'a lanta poko-poko for di swela, kohe mi chapara i sali bai pafo. Tabatin un bientu friw ta korta. Ma laman tabata kalmu. Riba e pidasitu plaja m'a mira e muhe pará. E tabata delega, blo sunu. Ku su man na laria e tabata grita jora. Bientu tabata pone su kabei largu bula.
M'a grit'e: Mira, ta kiko a pasa?
Di ripjente el a stop di jora i bira wak mi. Mi no por a mira su kara na e distansha ku mi tabata, pero e manera ku el a dal su mannan, tapa su pechu, a butami kompronde ku el a spanta.
M'a bolbe grit'e i zwai man pa e kamna bin.
‘Ay, mi Dios’, el a kuminsa sklama. ‘Dejame, por favor. Dejame’. I mesora el a kuminsa kore manera hende ku a perde kabes. Ami a keda tur babuká. Tur sorto di kos a pasa den mi kabes. Pasobra mi no por a kompronde ta kiko un muhe ta hasi riba un isla asina solitario. Ademas no tabatin ningun boto ni barku den serkanía.
‘Bini aki’, m'a grit'e. ‘Aki nos tin kumínda ku awa’. Pero el a sigui kore i trompeka varios be, te ora m'e tend'e dal un gritu masha mahos i bula na awa.
Auteursrechtelijk beschermd