Entrada
Pierre a dediká e kuentanan akí na su mama dia el a publiká nan na aña 1969. Esei ta prueba palpabel di e ambiente den kua e outor akí a nase i lanta. Ta tempu sin tantu distraishon manera nos konosé awendia. Pero esei lo no tabata sufisiente motibu. E dedikatoria ta revelá tambe e pasenshi ku mama tabatin ku yu, dedikando tempu na skucha loke e yu ta kont'é. Pero tambe nos ta sera konosí ku un yu ku tabatin e plaser di sinta skucha kuenta ku e mama tabata kont'é i verso ku e mama tabata resitá.
Ta sigur ku ya na mucha Pierre tabatin e tendensia di opservá, skucha, penetrá e mundu no solamente na kas, sino tambe pafó di kas. I serka su mama, kende e ta yama kariñosamente Machi, ora e kera konta loke el a eksperimentá, e tabata haña un oido atento.
Sin duda ta asina e yu ku a bira un di e mihó poeta- i kuentistanan na papiamentu a sa di opservá, registrá i pone su eksperensia, pensamentu i sintimentu riba papel na benefisio di papiamentu.
Den Kuenta pa kaminda Pierre ta pinta situashonnan real ku el a pasa aden. Òf e ta deskribí kerensianan di nos pueblo i e realidat ku ta rondon'é. Por ehèmpel e kuenta kaminda e ta deskribí e señora kòrtadó di orea, ku e ta duna un buèlta di sorpresa na final. E kerensia ku no por kap palu grandi dilanti di kas, komo esei ta yama morto. Tata ku no ta puntra pa yu, diskriminashon i idealismo den e kuenta ‘Yu pretu’, kontraste entre sintimentu di gratitut di un trahadó humilde pa ku su hefenan i loke e hefenan ta pensa di dje.
Kada kuenta bo por lesa i bolbe lesa. I, Pierre no ta laga di inkorporá un sneif di ironia den hopi di e kuentanan i den algun di nan tambe un toke di humor típiko di dje.
Manera un hóben ku sa deklamá obra di Pierre a laga sa algun dia pasá: ‘Den Pierre su obra kada palabra ta na su lugá. No por kita ni pone ningun palabra di loke Pierre a pone riba papel.’
Lektor, na abo pa komprobá esei, segun bo ta saboriá e ‘kuentanan pa kaminda’.
Sidney M. Joubert
Presidente di Fundashon Pierre Lauffer
Auteursrechtelijk beschermd