Raspá

[p. 25]

Paseo

Komo tabatin un dusji luna kla, m'a disidí na baj dal un bwèltu den kaja, prome mi subi kama. I gosando kon e klaridat swave tabata basha su splendor trankilisante riba nos isla, m'a kèjru un pia-un pia den ajru fresku, baj pariba.

A parsemi, ku e bjentu agradabl i e ambjente pasífiko di naturalesa a hasi efekto riba tur hende. Pasobra òwtonan tabata kore masha poko-poko. Apenas mi por a tende kòmbrsashon di e diferente parehanan, ku m'a topa riba kaminda; asina ketu nan tabata papja. Asta poko chabalitu, ku generalmente sa kamna borotá na trupa, tabata dal un paseo masha desente, gosando ku nan radio chikitu di bateria. Den e shap na Colon tabata rèjna un kjetut stranjo. I djis mas pariba, den e sastreria di Bas Pipi, dos di su amigunan tabata sinta weta kon e ta drecha un karson, sin papja un pia di palabra. Tabata manera luna kjer a obligá tur hende di pausa i meditá den luho di su grandesa na firmamento.

Dilanti di misa di Santa Famia m'a drenta baj paden, pasando despwes pariba di misa, ku intenshon di baj subi pasa te riba Ser'i Dòmi. Den un kas pariba di e skol di muchamuhe un radio tabata toka e konsjèrto pa pianu di Chopin. Esta bunita e pianu tabata surgi kada be, ku su melodia atraktivo, for di e kompanjamentu di orkesta. M'a sinti un nesesidat di para gos'e. I na e otro banda di kaja, kaminda tin un máta grandi di ‘karaktr di jònkuman’, m'a para den e pida huki suku, pa mi skucha e bunita muzik.

Den esej m'a tende kon dos hende tabata aserkando mi; un muhe bjew i un hobensitu tabata kòmbrsando dushi-dushi. I sigun nan a pasa mi dilanti, m'a ripará ku ta Tansha ku

[p. 26]

Eduardo, su ju sjegu. E mama gordo tabata tene man di su ju hòmbr i Eduardo su pianan tabata pisa swela ku masha konfjansa. E tabata kamna ku asina tantu siguransa, ku un hende ku no sa, lo por a kere ku e brel skur na su kara tabata e ultimo kapricho di moda pa jònkuman. E bjehita, un poko mankaron, tabata pasa balente trabòw pa hupa riba kaminda ku su kurpa gordo. Pero maske zonidu di su rosea a duna prueba di su kansansjo, e tabata splika Eduardo masha kontentu ki bunita e lus di luna tabata lombra riba e dos tórchinan di misa di Santa Famia.

‘Ta na e bahada banda di misa nos ta anto’, Eduardo a splika su mama, ‘ta pesej mi ta sinti e kaja ta baj abòw’. Tansha a sigui kontele dje skol nobo, dje bendementu di kosdushi na e otro banda di kaja i dje asera hanchu pariba di misa.

Sigun e mama ku su ju a sigui kèjru baj, e zonidu di nan kòmbrsashon a mengwa gradwalmente den mi orea. Na e lorada m'a mira kon e mama a glorja su kurpa. Mester ta ku Eduardo a sinti e moveshon di su mama. Pasobra el a bira puntra ta kiko a pasa. Sobrá palabra mi no por a tende mas. Pero si m'a weta kon e mama a bira, kwe man robes di su ju tene. Eduardo tambe a glorja su kurpa i nan dos a sigui baj -paso-paso i disparsé fo'i mi bista.