Par'un pinga
Un galinja bibitu, hinka den un monton di karkás i pintá manera un pòpchi, pero ku asina un plakás grandi di pujru den su lomba sunú, jen di pèshi, a janga baj mi dilanti, ora m'a sali for di boto. Su kurpa tabata na lugá i su dos pal'i pia bon formá no a laga di jama mi atenshon. I pensando riba e kombinashon fastjoso di pèshi ku bon figura, m'a sigui gosa e ritmo di su zojada ku mi wowo, sigun e tabata kamna baj riba Awasa di Punda. El a keda manera un punto séntriko, riba kwa tur hòmbr su bista a fiha i un ke otro lo mester a kaba di lanta fo'i sonjo pa via di e atrakshon fwèrte, ku e bònbònsitu a forma riba kaja. Ami mes a keda tur marjá di mira tantu kos bunita den ún solo kurpa, ku eksepshon naturalmente di e pèshinan.
Ora e damsita tabata jegando na skina di Duana, m'a tende un pia bon purá mi tras. Buskando ta ken, m'a mira Edgar ta hupa balente anshá, ku su tas bòw di brasa.
‘Kon ta ej?’, el a kumindami un krenchi kansá, ‘ta kiko? Ta un dia libr bo tin, ku bo ta kamna pensa asina?’
‘Nò, nò’, m'a kontest'e sonrjendo, ‘ta un embra manera un mundu m'a mira pasa awor ej. Pero el a dunami gana di saka ku e monton di pèshi mahos den su lomba’.
‘Ahan si? Ta unda e ta anto?’
‘At'e ta bai aja’, m'a splik'e, munstrando riba e pojojo, kende tabata kapja na e skina di Duana, zojando su brasa dòrná ku oloshi i pulsera. Edgar su kara a dal sera i el a para kome djente, di moda ku e árdunan na su sintí a keda move baj-bini.
‘Esej no ta bo preokupashon’, el a supla e palabranan
Auteursrechtelijk beschermd