Fort Amsterdam
Un tempu nos ku ta soltero a drumi den Fort Amsterdam, tras di loke tabata Postkantoor biew. Pariba di nos tabata keda e muraja di forti ku ta duna pa e plenchi di Wárda di Punda. E otro un banda tabata duna pa Waterfort.
Mucha muhenan di Postkantoor tabata pasa momentunan di plaser, ora sirena di alarma pita. Nos tabata bula lanta, kore sali mitar bistí, pa bai okupa nos puesto riba e brandspuit na Warda di Punda. Den purá a sosode hopi be, ku un polis a sali na pidjama, ku su karson di uniform na man. Otro tabata bende barata, ku kil di karson habrí. Tin ku a sali hasta na karson sijo. Mester a kore masha purá, pa subi brandspuit. I e galinjanan tabata putri di harimentu.
* * *
Pepito tabata e figura mas interesante den Fort Amsterdam. E tabata makamba. Pero e nomber Pepito tabata nomber di karinjo ku un hembra den Punda a dun'e.
Por sierto Pepito tabata biba ku tal hembra. I komo e amor den nan dos tabata sumamente fwerte, Pepito tabata keda drumi serka su pida kos. Ma tabata prohibi pa drumi pafo. Varios be sergeant o majoor tabata bin kontrola ku nos ta na kas. I milagrosamente semper nos a logra na salba otro.
Un dia mainta trempan nos a pasa un sustu. Majoor a drenta mas o menos seis or di mainta, i kuminsa pasa den e diferente kambernan. Pepito no a jega ainda. Dos di nos a start un kombersashon masha largu ku e majoor, pa want'e mas tantu posibel.
Nos no a mira ora Pepito a drenta. El a pasa di parti patras, kita su kamisa, sali na flanel riba majoor. Su kabei tabata bon penjá, tur na pomada i perfume.
‘Mogge, majoor’, el a saluda ku kara seku. Nos a desea mil deseo, ku e majoor lo no a ripara, ku ta imposibel pa un hende lanta for di kama ku kabei bon penjá.
Majoor no a nota. I Pepito a bolbe skapa un kajente di cel.
* * *
Kruel ta loke un a hasi den Fort Amsterdam. El a hanja un kacho chiki di regalo. Pero e no tabata gusta e kacho. Riba un mainta el a tene schietoefening riba e kacho, ku e balanan ku el a kwe ora di ehersisio na Hato.
E pober kacho a bula i grita, sigun bala tabata kwe su kurpa. Ta bon ku e pober a muri mesora, sin sufri hopi. Mariniernan den Waterfort a kore sali, pa mira ta kiko. Despwes ku nos a grita, splika nan, nan a bolbe bai.
Auteursrechtelijk beschermd