Kas Chikí
Dos o tres be m'a hasi warda na Kas Chikí. Nada di kanta makamba.
Un warda laf, ketu. Den e kas riba e pidasitu seru mi tabata sinta lombra wowo, guli stòf di kaya. Poko mas pabou tabatin dos o tres kas, kaminda e polisnan tabata biba.
E tempu ei ya Kabarèt di Pargata a pasa pa historia. E nòmber ‘Onze Vlag’ tabata resoná ainda, pero ya e tabata un kaska, un kadaver, ku un pasado rebultiá.
Un bon resultado so e wardanan na Kas Chikí a duna mi. Ei m'a sera konosí ku yu muhé di un polis. Un pichon koló di mespu. Un kara djispou. I un kurpa manera kurason di kualke chabalitu por deseá.
Patras den warda nos tabatin nos promé enkuentro. Ami no a pèrdè tempu, pero start di gòlpi ku namoramentu. Sunchimentu ku chupamentu di lenga a marka mi entrada.
Galiña a gusta ku mi. Di moda ku nos a palabrá pa sigui e freiashi na su kas. Dia ku mi a bai su kas, ni su tata ni su mama no tabata ei. E puitu a blo riba mi, bistí na su karson so. Dos pechu tamaño di pera a buta mi wowonan span.
Sin preliminario e mucha a kombidá mi den kamber. I riba kama di su mama nos a frei, ku matras tabata pidi pordon. Pero ku esei e galiña no tabata satisfecho. El a bisti su paña di baño, invitá mi ban landa den un baki di un hòfi djis banda di su kas. Den hòfi amor a bai gol.
Poko tempu despues, na Penstraat 24, mi ta konta mi dos amigunan di kuarto, kon bon mi a pasa ku e galiña, ku tabatin kabei rondó di su bikinan di tete.
Tur mi dos amigunan a grita hari pareu i puntra mi: ‘Bo ke men Nettie? Anto e tin un frèt den su pechu?’
Mi ilushon a dirti mes momentu. Tres mosketero pa un puitu tabata di mas.
Nunka mas mi a mira Nettie.
Auteursrechtelijk beschermd