Un selekshon di palabra i ekspreshon. Deel 2

Bida i morto

Kaminda mi lombrishi ta derá	Awa di parimentu
Nase i muri	Kòrta lombrishi
Un kadaber	Frumu, partera
Un kriatura resien nasé	Karga barika, parto
Santana, kerkòf, Beth Haim	Paña di faha barika
Buraku, kèldu, tumba, graf	Yu na lechi
Dera, bai morto	Kria yu limpi

Un yu ku nase ku shete luna ta mashá delikadu. Poko promé ku un muhé duna lus, e ta kibra awa. Hende bobo ta kere ku un yu parí (nasé) na saku ta mira spiritu. Djis despues ku un kriatura nase, ta kòrta su lombrishi. Partera ta e nòmber moderno pa frumu. Nuebe luna largu un mama ta karga barika. Ehersisio despues di parto ta hasi mihó efekto ku e paña di faha barika. Nan ta bisa ku un yu na lechi no ta haña ferkout. Si un mama sigui duna su yu lechi di pechu sin menstruá, e ta kria yu limpi.

Kaminda m'a nase ta kaminda mi lombrishi ta derá. Lei no konose folester. Loke mester pa dera un hende ta e deklarashon di dokter ku el a muri. Santana tin muraya, pero esnan paden no por sali i esnan pafó no ke drenta. Beth Haim ta e santana di hudiu tras di Isla. Santana di protestant ta kerkòf i misa di protestant ta kerki.

Dochi a yega te na bok'i buraku, bolbe biba. Si bo tin moda, bo ta laga lanta un kèldu di ún, dos o kuater boka. Yu di mas chiki ta mata mama. Mester òp un yu ora e nase. Papel di bieu ta un ekstrakto fo'i registro di nasementu. E ekspreshon ‘Shete serbètè, un tafla’ ta uza pa e muhé ku a haña yu ku diferente hòmber. Manera su mama a parié (blo sunu). Si bo n' tin mama, Io bo mama wela (bo mester adapta na sirkunstansha).

Un buraché den shap di ku su amigu: ‘Bru, bebe ròm, pasobra aworo den shelu ta blo lechi ku suku so nan ta dunabu; i si bo resulta den fiernu, bo n' ta haña ni un pingu'e awa pa freska bo korokoro’. Dia di tur difuntu hopi hende ta bishitá santana. Bida eterna. Traha testament. Di kuna pa tumba. Weseis na Santa Rosa tabata mashá konosi. Un animador na televishon a yega di bisa: ‘Mi ta gana mi bida ku sodó di mi lenga’.

E kuminda dushi akí ta lanta morto fo'i santana. Gachi ta traha pa bibu ku morto, p'e bini kla. Sòpi di mondongo ta Djo su bida largu.

[p. 19]

Pena la bida bo hasi e kos ei! Lo mi sende bo bela (Io mi biba mas ku bo). Duelmi muchu bo pierdè. Es ku Dios ke. I despues ku kaba di dera: Deskanso. Amen. Un hende di bida (muhé di kaya). No laga morto na santana, bin yora na kas (hasi kada kos na su tempu i lugá apropia).

Ken a muri? (Ta kiko a sosodé?) Bo sa, bo ta biba largu. Awor ei nos ta menta bo nòmber i atabu a blo riba nos. Morto di muzik (entiero di un militar). Ma muhé, laga morto su nanishi kal promé bo kuminsa ku bo lokura. E tata a muri, laga su yunan bon pará.