di awaseru. Nanzi ta bati su kasá ku pal'i funchi tra'i porta (awaseru ta kai ku solo). Awaseru ta kai, yobe, finfin, sprengu, pinga, spat. Para un pinga (no tabata falta nada). Pied'i bos ta hacha di pieda ku antes indjannan a uza.
Kana den awa i keda papa muhá. Kalor ta mata (ta hasi mashá kalor). Si tin un sírkulo grandi rondó di luna, nos ta bisa ku luna ta kargá, loke ta nifika ku por spera awaseru. Un mucha lihé manera welek (rápido). Tabata djis un huma di awa pa baha stòf. Kore guil (pasa den mal tempu).
Si shelu pinta korá atardi, kasi sigur no tin awaseru su manisé. Bient'i awa ta e bientu fresku ku tin djis promé ku awa kai. Den su poesia ‘Ata nubia’ Joseph Sickman Corsen a deskribi e nubianan kargá di awa, ku ta priminti awaseru, pero ku ta bai basha nan rikesa pa piská den laman. Awa a bai largu: keda sin kai durante hopi tempu.
Awa di atardi no sa muha kabritu (prudensia ta evita problema o desgrasia). Aw'i yobe ta mas dushi ku aw'i pos. Bient'i kuaresma o bientu di seka maishi ta bientu fuerte den luna di mart. Solo fuerte sin bientu ta solo di guma.
Kue solo: sinta den solo pa kenta kurpa. Mainta trempan o atardi ta hasi fresku. Dochi ta fo'i friu (e no tin preokupashon mas, pasobra e tin su sèn wardá). Paña muhá ku no haña solo ta kria dewer. Nos bient'i ost konstante ta duna alivio kontra kalor. Ku termometer ta midi temperatura, ku barometer preshon atmosfériko i pronostiká wer. Na Hato tin un stashon meteorológiko. Antes hopi kas tabatin nan renbak. Ora tin bos ku welek bo no mester skonde bou di palu! Tabatin horkan grandi na Korsou dia 23 di september 1877 i 17 di agosto 1886 tabatin un siklon. Un rabu di horkan nos a haña dia 1 i 2 di november 1932.
Auteursrechtelijk beschermd