Itinerario, voyage ofte schipvaert naer Oost ofte Portugaels Indien 1579-1592. Deel 3

S. Crus, Hay, Hay.

⁺Van Boriquien comt men aen 't Eylandt S. Crus²⁾, in vorighe tyden van die Inwoonders Hay, Hay gheheeten, 'twelck van Canibalen ofte Mensch-eeters bewoont was, als oock die naest aen ⁺ligghende Guadalupea, dat zy Quiera, Quiera noemen, welcke Caribes ofte Canibalen in korter tijdt over die 5000. menschen uyt die omligghende Eylanden gherooft hadden ende ghegheten. Daer na komt men aen seer veel andere Eylanden, die niet anders ligghen als een Archipelago, hebben oock die selvighe name, dan die Eylanden zijn vele ghenoemt nae haer figuere ofte ghestaltenisse, ghelijck Anguilla, dat te segghen is een Ael, want die lanck, crom ende smal is. Redonda Maria, om dat het eender spheren ghelijck ⁺is, ende seer rondt. Mons serratus, dat is besloten bergh, om dat sulck Eylandt hooghe Berghen rondtsom heeft, vol volcks ende ⁺victualie, sommige van Santen ofte Santinnen, als S. Martin, S. Bartholomeo, S. Barbara, Beata Virgo antigua, tot de oude lieve Vrouwen, die alle op eenen streeck ligghen, schoon van aensien, sommighe groen van gras ofte van verwen, andere root, andere blaeuw, geel, violet, dat het een verwonderinghe is voor die voorby varende, konnen oock veelderley verwen daer uyt ghemaeckt ⁺worden.

+ S. Crus, Hay, Hay, oft Ay, Ay.

2) Over S. Crus en de daarna vermelde eilanden, de kleine Antillen, en over de Canibalen die deze eilanden bewonen geven Petrus Martyr en Oviedo herhaaldelijk naricht. Zie o.a. Ramusio III fol. 2-4, 19, 27, 38, en 85.

+ Quera, Quera. Hier op woonen Canibalen die in corter tijt over 5000. menschen van ander Eylanden gherooft ende ghegeten hadden.

+ Anguilla. Redonda.

+ Mons serratus light 36. mylen van Guadalupea teghens middernacht heeft int ronde 40. mylen.

+ S. Martijn. S. Bartholomeo S Barbara.