Kribbelkes. Gediechskes in 't Mastreechs

[p. 83]

Sakkermintsdaag.

Dao vlamp allein e lempke daag en nach
en elken daag gestiedig door
veur Eur klein cèl, Eur woeningske
in 't altaor op 't sjoen, hoeg koor.

Geer woent dao door 't groet geheim wat Geer
us gaof d'n aovend vaan de Witten Donderdag,
wiet Geer Uuch gans gegeve höb
en toen allein aon us mer höb gedach.

't Vlemke is allein getuige, daag en nach,
vaan wee dao kump en beijt en smeek bij Uuch,
en wee, kapotgeslage door 't leve soms,
weer weggeit, door 't beije gans verluuch.

't Vlemke is allein getuige, daag en nach,
vaan wee dao kump en daank brink mèt zie beije,
en gans getruus dao stik e keerske aon,
of offerde wat Geer 'm gaof te leije.

Geer wout gein mantele vaan hermelien,
gei simpel pekske zellefs mèt e kreegske,
Geer wout es woening mer 'n hiel klein cèl,
es wachter mer de vlam vaan 'n oonnuuzel leechske.

Geer wach mer stèl op us dao, daag en nach,
en elken daag en nach gestiedig door
in Eur klein cèl, Eur woeningske,
op us allein, dao op 't sjoen, hoeg koor.