Glorie zy den Vader, ende den Soon, ende den heylighen Gheest.
Antvv.
Als't was in den beginne, ende nu, ende altijdt: ende in de eeuwen der eeuwicheden sal wesen. Amen.
Alleluia, Oft: Lof zy u Heere Coninck, &c.
Hymne.
O Goede Iesu, uwen Naem
Sterckt ons in deughden al-te-saem:
En maeckt ons leven sonder blaem,
Ons sterven tot u rijck bequaem.
Noyt soeter sanck, noyt sulck jolijt,
Noyt oor' in't hooren soo verblijt:
Noyt ziel' en was tot eenich tijt,
Soo vreughdich als ghy Iesu zijt.
Deught, eere, macht, en danckbaerheydt,
Zy Godt van al in eeuwicheydt:
Die ons door Iesus naem bereydt.
Den Gheest, die ons ten hemel leydt. Amen.
Antiphone.
Heere, in uwen Naem maeckt ons salich.
Capittel.
Den ghenen die verwint, sal ick gheven eenen witten blinckenden steen, ende in den steen eenen nieuwen Naem gheschreven, den welcken niemandt en weet, als die hem ontfanght.
[pagina 226]
[p. 226]
Antvv.
Gode zy lof.
Vers.
Ick sal uwen Naem altijdt loven.
Antvv.
Ende dien t'samen prijsen inder belijdinghen.
Vers.
Heere verhoort mijn ghebedt.
Antvv.
Ende mijn gheroep kome tot u.
Ghebedt, om de volmaecktheydt der dry Godlijcker deughden te verkrijghen.
O Godt, van wien alle beste gaven ende hemelsche benedictien komen, gheeft ons ter eeren van den glorieusen Naem Iesvs, de volmaecktheydt der dry Godlijcker deughden; te weten, een oprecht boven-naturelijck gheloove, vaste hope, ende vyerighe liefde tot u boven al; ende maeckt dat wy noyt in dese deughden en verflauwen, maer wel ghedurichlijck door uwen by-standt groeyen: op dat wy soo onsen Christelijcken roep volkomentlijck moghen beleven, ende verdienen het ghene dat wy hier ghelooft hebben, namaels claerlijck te aenschouwen, dat wy ghehopet hebben te besitten, ende met u, dien wy boven al bemint ende ghedient hebben, eeuwichlijck vereenicht te blijven. Door den selven Iesum Christum onsen Heere. Amen.
Vers.
Laet ons den Heere ghebenedijden.
Antvv.
Gode zy lof.
Vers.
De zielen der gheloovighen moeten door Godts bermherticheydt in vrede rusten.
Auteursrechtvrij
