DEn Heere Iesus geve ons door sijn heylich lijden hier ghenade, ende namaels het eeuwich verblijden.
Vers.
GOdt merckt aen tot mijnder hulpe.
Antvv.
Heere haest u om my te helpen.
Vers.
Glorie zy den Vader, ende den Soon, ende den heylighen Gheest.
Antvv.
Als't was in den beginne, ende nu, ende altijdt: ende inde eeuwen der eeuwicheden sal wesen. Amen.
Alleluia, Oft: Lof zy u Heere Coninck, &c.
Hymne.
IEsum met doornen ghekroont, verscheurt met swepen,
Handen en armen met koorden vast ghenepen:
Heeftmen het vonnis des onrechts voor-ghelesen,
End' om ons sonden, aen 't houdt ter doodt verwesen:
[pagina 258]
[p. 258]
Op sijn teere schouderen is hem een Cruys gegeven,
Dat hy daer soud' sterven naeckt, die ons kleedt, en doet leven.
O goede Iesu, in u bloedighe weghen,
Hoe menigh hebdy verwijt, stoot, slach ghekregen?
Dat u met recht mocht Veronica beklaghen:
En schreyen, die u in desen jammer saghen,
Iesu doet my volghen u, in't derven aller lusten,
Ende na den laetsten strijdt, in uwe vrede rusten.
Eer zy den Vader, dat wy van niet ontstonden,
Prijs zy den Sone, die ons heeft weer ghevonden,
Doen wy van sijn rijck, de recht paden misten,
En werelts wijsheydt ons draeyende naer haer listen,
Want soo waren wy van hem altijdt verdoolt ghebleven,
Hadde Godt den Gheest ons niet tot Christus koy ghedreven. Amen.
Antiphone.
Ick was by u daghelijcks in den tempel leerende, ende ghy en hebt my niet ghevanghen; maer nu ghegheesselt, leydt ghy my buyten om ghekruyst te worden.
Capittel.
O ghy alle-gader die voor-by gaet over den wech, bemerckt ende besiet oft daer eenighe pijne mijnder pijne ghelijck is.
Antvv.
Gode zy lof.
Vers.
Met groote vreught heeft hy het Cruys ghedraghen.
Antvv.
Met verachtinghe van alle verwijt.
Vers.
Heere verhoort mijn ghebedt.
Antvv.
Ende mijn gheroep kome tot u.
Ghebedt, ter eeren dat Christus door sijn heylich lijden de sonden vervvonnen heeft.
O Sonderlinghen troost aller menschen Iesu Christe, die door uwe oneyndelijcke liefde on-
[pagina 259]
[p. 259]
se sonde op u ghenomen hebt, ende die door u alder-bitterste lijden vernielt hebt; wilt ons, door uwe sware pijnen, sulck eenen haet aller sonden in-drucken, dat wy liever alle tormenten souden lijden, als ons, door vrywillich consent, in hare slavernije begeven. Die met den Vader, ende den heylighen Gheest, eenen Godt leeft ende regneert inder eeuwicheydt. Amen.
Vers.
Laet ons den Heere ghebenedijden.
Antvv.
Gode zy lof.
Vers.
De zielen der gheloovighen moeten door Godts bermherticheydt in vrede rusten.
Auteursrechtvrij
