Van Metrodorus, Schilder, en Philosooph van Athenen.

Metrodorus was een seer uytnemende Schilder, en in alderley Philosophie seer gheschickt, en ervaren, was een Athener. Het is gheschiedt, dat Lucius Paulus, den edelen Romeyn, doe hy in den strijdt hadde ghevangen den Coningh Perseum, aen die van Athenen heeft begheert, datse hem souden seynden te Room een volcomen ervaren Philosooph, om zijn kinderen te leeren en t'onderwijsen: oock een uytnemende Schilder, om te schilderen de Archetriumphalen, en andere dinghen tot zijn heerlijcke incomste, die te Room t'zijnder vereeringhe worden bereydt ghemaeckt. Waerom die van Athenen, hun

beradende, sonden Metrodorum, en versekerden Lucio Paulo, dat desen Man in beyde deelen hem wel dienen soude: want hy in beyde Consten en wetenschappen gantsch ervaren was, het welck hy dadelijck also bevonden heeft warachtich te wesen.