Het leven van Mathijs en Ieroon Kock, Schilders van Antwerpen.
Ghelijck Antwerpen in onse Nederlanden schijnt oft ghelijckt een Moeder der Constenaren, also
Florencen in Italien voortijt plagh te wesen: soo heeft dese vermaerde Stadt voortghebracht
verscheyden Constenaren, die in onse Const hebben aengewendt oock verscheyden gedaenten van
wercken. Onder ander, heeft sy haer oock verciert niet te hebben ghehadt tot een Borgher
Mathijs Kock, die een uytnemende Meester is gheweest in Landschappen. Hy was oock
d'eerste die de Landtschappen op een beter manier begon te maken, met meer veranderingen, op
de nieuw Italiaensche oft Antijcksche wijse, en was wonder versierigh en vondigh in't ordineren oft
by een voegen. Schilderde van Water en Oly-verwe seer uytnemende stucken. Van Ieronimus
Kock, zijn broeder, heb ick niet veel te segghen: want hy verliet de Const, en begaf hem daer
Coopmanschap mede te drijven: liet schilderen, cocht Oly en
Water-verwe doecken: liet Plaet-snijden, en hetsen. Hy was doch self seer inventijf van
Lantschappen, en heeft self verscheyden dingen ghehetst: maer
evenwel veel van Mathijs zijn broeders dingen,
insonderheyt 12. Landtschapkens, die van yeder noch geern worden ghesien. Dus is Ieroon
rijck gheworden, coopende d'een huys by d'ander, hadde doch geen kinderen dan een Hollandtsche
Vrouw, Volck oft Volcktgen, ghenoemt. En ghelijck hy boertigh en een Rethorijcker
was, seyde en schreef hy dickwils als voor advijs: Laet de Kock koken om t'volcx wille. Somtijts
stelde hy uyt sonder letters: Houdt die Kock in eeren, en derghelijcke dinghen. By eenigh dinghen
schreef hy op zijn oudt Rethorijcks:
Den Kock moet koken om t'volcx wil van als,
D'een ghebraden, en het ander ghesoden:
Wie desen cost niet mach, t'zy hardt oft mals,
T'Wtspouwen en is hem niet verboden:
Maer om Kock oft volck niet te blameren,
Verswijght de fauten, t'sal elder passeren.
Hy is ghestorven ten tijde doe Frans Floris overleedt, dat is, in't Iaer 1570. Mathijs
was langhe te vooren ghestorven. Tot hem is dusch Lampsonisch ghedicht:
Ghy waert Mathijs in Const van Landtschap soo bedreven,
Dat ons eeuw' ws ghelijck en heeft nouwlijcks ghegheven:
Nu onder Constenaers gherekent blijft, daerom
Dat Nederlandt ghy eert met eeuwigh tijdtschen rom.