Rhetorica, dye edele const van welsegghene

¶ Van dat vierde deel der Inuentie, dwelcke is die Confirmatie.

[fol. 17r]

COnfirmatie, dat es een vastmakinghe oft versekeringhe, bi den welcken wij ons narratie oft Propositie vast maken, doen blijcken, ende geloue gheuen. Dit geschiet in vele diuersche manieren. Als bi redenen, authoriteyten scriftueren, exempelen, ghelijckenissen, circumstantien vanden personen, vanden saken, vanden tijt, plaetse, cause, occasie, costume, ghemeenen voys, ende dierghelike, dwelcke een yeghelijc die verstant heeft, lichtelijck vinden ende obserueren mach bi hem seluen, te wetene wat zijnder causen helpen oft deeren mach. Hier es wel te noteren hoe alle die victorie vanden Rhetorisien, metgaders die hope ende cracht van wel te persuaderen, principalijc ghelegen es in tween saken dat es in wel zijn voortstel ende redenen te confirmeren, ende dat hem tegen es wel constelijc te refuteren.