Princelijcke deuijsen

[fol. 4r]

Nullis praesentior aether.

Die Hebreeusche letter Thau, als ons S. Iero.⁺ is bescrijuende, opt euangelie vanden euan-

+ S. Hieronimus

[fol. 4v]

geliste S. Marcus, is een heylich, ende salich teeken, ende figuren vanden cruyce. Met sulcken⁺ teeken heeft die Prophete Ezechiel inden gheest der prophecien hier voortijs vanden Engel opt voorhooft sien teeckenen die gheloouighe menschen, dewelcke in hen herten bedroeft waren, om die leelike ende afgrijsselijcke sonden, die binnen de stadt van Ierusalem bedreuen werden: deur welck teecken dat sy bewaert ende ghesalueert werden, onder die quade menschen die door die Goddelijcke sententie seer haestich ghedoot werden. Ten anderen soo beteekent dese letter Thau, een voleyndinge: want het is de laetste letter vanden Hebreeuschen A, b: den seluen sluytende ende volmakende. Twelcke niet sonder groote mysterie also en is geordineert geweest, gemerct dat onsen verlosser ende salichmaker hanghende aen het hout des cruycen was sprekende dese sijn laetste woorden, eer dat hy starf. Consummatum est, Dat is te segghen, Het is vervult. Gheuende te kennen dat alle prophecien ende schrifturen die te voren van hem waren gheschreuen, als doen al volcomen ende vervullet waren, doen hy verheuen was aen het teeken van deser letter. Dewelcke gheschreuen sijnde in capitale letter, is beter ghelijckende het teeken van-

+ Ezech. 9.

[fol. 5r]

den Cruyce, dan yet anders. Ende oock soo wel de Griecken als die Latijnsche schriuense noch opden dach van heden inde ghedaente van een cruyce Τ. Sulcx is dan het warachtige vendel ofte baniere der Christelijcke ridders.