Princelijcke deuijsen

[fol. 16v]

Non sine caussa.

In allen administracien ende regemen-

[fol. 17r]

te van volcke, landen, plaetsen ende steden, soo ist bouen al alder nootsakelijcst datter Iusticie regnere. Want andersins ist datter gheen Iusticie ghedaen wert, soo machmen wel versekert wesen, dat sonder faute alle vrientschap ende ghemeenschap onder die menschen daer vergaen moet ende een eynde nemen. Daeromme de ouerheyt ende hoochheyt ende generalijck alle wethouders, die de hant houden aen het sweert van Iusticien in des Conincx handt, behooren van een yeghelijck ghehoort ende eere beweesen werden, als van Godt gesonden ende daer ghestelt, om te wesen de toevlucht, bewaerders ende beschermers vande goede menschen: ende oock een vreese, grouwel ende straffinghe vande quade ende boose menschen. Ende dat volghende den raet vanden Apostel S. Pauwels segghende.⁺ Willen wy dan gheen vreese hebben voor de Iusticie ende Ouerheyt, so moeten wy altijts wel doen: ende alsoo in stede van die te vreesen, worden wy van haer ghepresen: want Iusticie is een dienersse Gods tot onsen weluaren. Maer ist dat wy quaet doen, soo moghen wy die wel vreesen: want sonder oorsaken en draechse het sweert niet, ghemerct datse een dienersse Gods is om recht te doen ende wrake te nemen ouer die ghene die quaet doen. Daeromme moetmen

+ Rom.

[fol. 17v]

haer onderdanich wesen, niet alleene om de wrake ende gramschap wille, maer om ons eyghen consciencie te ontlasten. Wt deser oorsaken soo betaelt ghy tribuyt: Want Princen, rechters ende wethouders hem seluen daer toe begheuende, sijn dienaers Gods. Daeromme soo gheeft een yeghelijck datmen hem schuldich is: die men tribuyt is schuldich gheuet hem: die men tol, gheeft hem tol: die men onsach, ontsiet ende vreest hem: die men eere schuldich is bewijst hem eere ende reuerencie.