Princelijcke deuijsen

[fol. 144r]

Num flatus telluris honor?

Die Romeynen hadden voor costuyme,⁺ dat die inwoonders ende ondersaten vanden lantschapen die henlieden subiect waren, schoncken voor een willecome de officiers die nieuwelingen in haerlieder prouincien gheordineert werden, baillu oft gouuerneur, seuen stuyuers voor elck hooft, eenen risch, een sluetel ende een ronden cloot oft bal. De risch schoncken sy hem tot een teeken dat hy behoorde te stellen sulcke ordonancie binnen slants, dat die etelicke waere

+ Codi. 12 tit. de Praeto.

[fol. 144v]

niet diere soude wesen, maer ghehouden worden op een redelicken prijs, om datter gheen dieren tijt oft ghebreck int lant comen soude. Ten ander om dat desen President hem soo wijsselick soude houden onder zijn ondersaten, dat sy henlieden souden moghen laten duncken voor een risch aerde, ontfaen te hebben een gheheel velt. Tpresent vanden sluetel, om te beteekenen die liberteyt, autoriteyt en volle macht van zijnder iurisdictie. Den bal oft cloot, om te bewijsen die groote macht: alsoo men leest dat Alexander wtleyde tbediet vanden bal oft ronden cloot, die hem vande Coninc Darius was ghesonden. Oft anders soo beteekent desen bal die gheheele administracie vander oorloghe.