Rethoricale wercken

[fol. IIr]

Alle Rethorica conste beminders salighe ende voorspoedige groetenisse E. de Dene, goetionstelijck wenscht.

AEnghesien dat in voorleden tijden, hebben geweest diuersche oude ende ionghelinghen, henlieden somtijts exerciterende ende onledich makende, in die loffelijcke gheinspireerde, onleerlijcke ende prijselijcke conste van Rethorica te ghebruyckene, in vlaemsche tale oft sprake: Sonderlinghe dien eerwaerdighen Vader ende Meestere, saligher memorien, Anthonis de Roouere, vry metselaer van zijnen ambachte, ingheboren Poortere ende inwoonende der Stede van Brugghe, die welcke sonder twijffele by godlijcker inghestorter gratie so inden gheest verlicht was, sulckerwijs dat hy inde voorgenoemde conste soe gebesoingneert, gheexpresseert ende diuersche stucken ghecomponeert heeft, als wel dienende hoochwaerdich ghepresen int licht ghebrocht te zijne, ende gheensins (midts den ouderdom ende onachtsaemheyt der onwetende, geheel verduystert te moeten blyuen. Te min by dat de selue ende meest alle zijne wercken inhouden, begrijpen ende vol zijn, van goede duechdelijcke ende oprechte vermaninghen, prijsende ciuile manierlijckheden, ende liefmoederlijck straffende ende blamerende alle boesheden, ende ydele bedriechlijcke pompieusheden des werelts) maer te meer verheuen tzijne, by dat wy ooc vinden datter in Vranckerijck voormaels ghefloreert ende gheweest hebben diuersche, hooghe, vermaerde, excellente ende fameuse, seer constachtende, Constenaers inde voorgenoemde Rethoricale conste

[fol. IIv]

die ghebruyckende in Franscher oft walscher tale, inder waerheyt lieftallich ende yeghelijcken bequame zijnde, als namelijc die groote Poeten, Franschoys Villon Parisiaen, Clement Marot, M. Jan molinet, ende diuersche ander gheestighe ghelaudeerde Rethorizienen, vanden welcken vele huerer artificiale wercken in printe openbaer zijn, midts dien so wel a daer als herwaerts ouer, tot geschicter recreatie onder den menschen bekent ghemaeckt. Soe heb ick wt liefden, die ick totter selfder conste ben draghende ende my teender recreatie: My gheschickt by langher handt te vergaderen ende by een te copulerene eenighe particuliere stucken, bijden voorgenoemden Anthonis de Roouere (die een vlaemsch Poete was) ghemaeckt zijnde. So in partie wt zijn eygene oude hantschriften ghecopieert, als ooc wt sekere hantboeck wijlent ghescreuen by eenen notabelen Poorter der voorscreuen Stede van Brugghe, dye metten seluen Roouere seer familiaer was, ende dickwils frequenterende, by dyen vele van zijne wercken om wtscrijuen van hem gheleent creech. Ten fine ende met meyninghe die oock naemaels te doen printen by manier van een hantboecxken wt te laten comen ende onder de vlaemsche tonghe, insghelijcx als de voorgenoemde walsche wt ghedeelt te moghen worden dies soe wel waerdich zijnde, als behoudens der reuerentien van henlieden, vanden anderen voorghenoemde Poeten wercken, ghedaen is gheweest, die het magistraet der gheleertheden ende doctrine hadden by exempelen ende voorbewijsinghen scholasticque ende den voorscreuen Roouere maer een Jdiotus, ende simpel leeck, ongheleert ambachtsman was: niet hebbende

[fol. 1r]

dan zijn vlaemsche ingheboren Lanttale oft spraecke. Hebbende nochtans zijn Rethoricale wercken soe ornatelijck daer mede connen verchieren, becleeden ende beleeden, als dat hi in sekere generale vergaderinghe, feeste der Rethorijcken in Brugghe gehouden, ontrent maer xvij. iaren oudt zijnde, verdiende ende toe geiugeert was, den prijs ende den tijtle gegeuen: Prinche der Rethorijcken alsdoen genaempt te zijne, dwelcke hi obtinueerde met zijnder Rethoricale solutie op de vraghe: Oft moederlijck herte lieghen mach? Ende van doen voort aen (als florerende Laurier van Minerua geplant) artistich op wassende, groeyende ende bloeyende tot scientificque wetentheden, van veelderhande gheestelijcke redenen ende morale expositien. Daer naer makende een wonderlijck lof vanden heylighen Sacramente, daer vele gheleerde inne verwondert waren, tselue eyndelijck bijden examinateurs van dien, verclaert goet, correct ende oprecht int ghelooue zijnde, in teecken van dyen geapprobeert, gheconsenteert ende toegelaten openbaer inde Heylighe Kercke, tot een yegelijcx deuotie in gescriften gestelt te moghen zijne, heeft dies de fameuse fame vercreghen dat hi genaempt wert: Vlaemsch Doctoor ende Poetich Rethorizien. Soe ghi beminde Lesere wt tselfde lof, ende meer andere zijne naeruolgende operatien ende wercken, sult bat claerlijcker smaken ende waer vinden. Blijft hier mede Godsuruchtich inden Heere beuolen, ontfaende danckelijck onse simpele facture, keerende ten besten de inepte elocusie te desen concluderende gheorboort: Sijt voorts weluarende ende anderwerf tot eewich weluaren.

AMEN.