|
| |
| |
| |
¶ A B C. van Maria.
Aenminnichste // Beuelichste // Curieuse
Duwagiere // Eerlijcxste // Fonteyne
Ghesinnichste // Heylichste // Joyeuse
Kancheliere // Leerlicxste // Mageleyne
Natuerlicxste // Ontfaermichste // Presentatie
Questinghe // Redelicxste // Soluerende
Tracterelicxste // Verwaermichste // Xcusatie
Ynuestinghe // Zedelicxste // conForterende.
| |
Een andere Maria Lof.
LOF Bloeseme soet vol alder virtuyt
Vander eewigher Drieuuldichede
Gloriose reene, der Enghelen iuyt
Alder wereldt paeys ende vrede
Js tresoor, daer tgoddelijck fruyt
Doch bid ick u, moeder in rechter bede
Versterckt mijnder broosscher sinnen ruydt
Om v te sprekene nv een saluyt.
AVE der sondaren troosterinne
Oueruloeyende moedre in alder duecht
Alder vruchtbaerste tonsen ghewinne
Want hemel ende aerde in v verhuecht
| |
| |
Track in puer oodtmoedigher minne
des Vaders cracht thuwaerts ghevuecht
Dies ghy by hem alle dinck vermuecht
En zijt hooghe verheven binnen tshemels thinne
Lof dan ghebenedijde Coninginne.
MARIA goddelijcke balsemiere
Onsprekelijck voetsels elcker creatuere
En gheene soe schoone, wijs van bestiere
Soe reyne, soe edel, soe net, soe puere
Ontfermt mijns hoe ick my regiere
Want ghy zijt der ghenaden duere
Dus ist al van soeten coluere
Dat al dat leeft, in v verchiere
Want Godt v bouen al glorifiere
GRATJA Sijt ghy Godts wtuvercoorene
Excellente Princhersse bouen al
Lelie binnen den scherpen doorne
Groeyende nae der schriftueren gheschal
Hoe ick naer v lof pijne te spoorne
Al ben ickx onwaerdich groot en smal
Ick kenne ghy zijt des duechts toeual
| |
| |
Vwe name heeft macht den vyant te stoorne
Oodtmoedichste voor den vadre tonsen oorboorne.
PLENA roose minnelijck ontloken
Doorvlieghen den hemel onbeschouwelijck
Gods liefste begheeren heeft v beloken
Naest hem als moeder, ende gheen so vrouwelijck
Vanden Propheten was ghesproken
Van Adams mesdaet, zijn wel ende ghetrauwelijc
Doch moeder al valt mijn leuen flauwelijck
Behoet my voor des vyandts stoken
Want door v so heeft hy de helle ghebroken
DOMINVS, vrauwe, bouen alle vrauwen
Vercoren ter werelt, voor eenich yet
Hy liet hem cruycen, gheesselen, hauwen
Van wien is ons meer vruechts gheschiet
Veriaechde v dracht, bloeme vol trauwen
Ghy zijt reynst bouen al ghewiet
V lof allen louen te bouen vliedt
Dats door v moederlijck betrauwen
Oock coempt ghy elck sondaer by in rauwen
TECVM is alle solaes vercreghen
| |
| |
Die hemelen niet mochten, maer woech te swaer
De Goddelijckheydt die heeft gheleghen
Jn uwe menschelijckheyt voorwaer
En is gheen sulck iolijt bedeghen
Als van v hoochste Princersse eerbaer
Dies is v lof in een eewich iaer
Van allen tonghen salich gheneghen
Want ghy zijt bouen natueren pleghen.
BENEDICTA TV ghy dan zijt
Moeder int hoochste Paradijs
Sacristie, daer al tswereldts iolijt
Van Jesse spruytende dwaerdich rijs
Caritatiuighe die teewigher tijdt
Om af te weerene des wereldts afgrijs
Die v dan dienen,zijn seker wijs
Dies seg ick met innigher herten verblijdt
Lof hoochste Princersse ghebenedijdt.
JN MVLJERJBVS soetste name
Die Moyses vandt, zijdy notable
Gheglorificeert in dhoochtste vraeme
| |
| |
Ter rechter handt des vaders curable
Behoedt ons, die ghebetert hebt tonbequame
Soe ons oorcondt schriftueren parabele
Ick bid v reyne maecht ende abele
Helpt my doch wte den dolende trane
Ghy vermoghes by uwen Sone eersame
ET BENEDJCTVS bouen allen goede
Spruytende moeder, edele, excellent
Die hem nae recht te vollen gheuroede
Der wereldt, dies vlecht ick dy omtrent
My aerm sondaer neempt in v hoede
Laet my in uwen dienst zijn resident
Lof wiens glorie niet en hendt
Maer iubileert inder minnen gloede
Lof wyens gratie vloeyt bouen allen vloede.
FRVCTVS VENTRJS uwe Suene
Die ons allen verloste wter noodt
Met zijnder passien in tslijdens gheduene
Voor ons steruende die bitter doodt
Beschermpt my voor tsondich ghebluene
| |
| |
Ontfermich te zijne cleyn ende groot
O Maria schoone Roose roodt
Aenhoordt ghy tghebedt niet vanden sondaren
Soe en is ons werck niedt weert twee snaren.
TVJ louick met nijghende kinne
Lof tempel der Godtheydt alder meest
Lof tresoor der saligher minne
Lof die ontloock der Godtheydt keest
Salich beschudt voor alle tempeest
Jn uwen handen beueel ick mijnen gheest
Dat ick mach comen ter glorien inne
Dat bid ick met oodtmoedighen sinne.
IESVS CHRISTVS ons alder behoedere,
Wilt voor ons bidden ter lester huere
V eyghen Sone, ons Godt ons broedere
Dat hy ons verleene zijn rijcke puere
Der ghenaden oueruloedere
Js hy tot elcken creathuere
O blomme alder soetste van ghuere
Om v te louene ben ick een spoedere
Lof wijse vrouwe, noydt gheen vroedere
| |
| |
AMEN hemelsche suyuer reyne
Neempt in dancke mijn salutatie
Touwer waerdicheyt clare fonteyne
Heb ickt ghewrocht by uwer gratie
Vercorene iont my doch de spatie
Eer dat de doodt mijn herte beswaert
Noch te louene uwe iubilatie
Jn meer singhen dijns lofs schoon rooseghaert
Sijt mijns behoudt, ter laetster vaert
Dat ick dan comme ter glorien stede
Ende by v blijue dienaere vermaert
Reyn bouen alle reynelijckhede
Oirlof sonder oirlof neem ick hier mede
Ontfermt mijns Maria, ick en gheerne niet el
Vercoorne moeder aenhoordt mijn bede
Ende hen allen die in reynder zede
Roeren v lof, brengtse alsoe wel
Eeuwich in glorien, Emanuel.
|
|
Auteursrechtvrij