Rethoricale wercken
(1562)–Anthonis de Roovere–
Auteursrechtvrij
[Folio 28r]
| |
WJe dat heeft goede constellatie
Der Planeten, heeft goede gratie
Wie anders heeft teghenspoet
Deen heeft ter werelt groote rengnatie
Dander heeft niet dan tribulatie
De werelt die is rechts ebbe en vloedt
Jst salichede besitten goedt
Soe mach wel aerm man roepen ach
Wie is ter wereldt soe wijs soe vroedt
Die weet wat hem ghebueren mach.
Elck mensche leeft zijn proper natie
Deene heeft fortunen visentacie
Dander terdt haren euelen voet
Goede complexie der generatie
Js hem groote confortatie
Die der werelt pleghen moet
Nochtans als elck zijn beste doet
Jnt Jaer coempt menighen droeuen dach
Hy en is soe heylich noch soe goet
Die weet wat hem ghebueren mach.
Ten baet gheen groote murmuratie
Ten baet wanhopen noch desperatie
Hemel noch aerde noydt stille stoet
Elck doe zijn selfs informatie
Wat is tswereldts habitacie
Ten roert altoos, tsy vleesch oft bloedt
Nv wel nv wee, nv suer nv zoet
Nv coudt nv heet, nv ween nv lach
Hy en draecht ter wereldt capproen noch hoedt
Die weet wat hem ghebueren mach.
| |
[Folio 28v]
| |
Prinche wat is de wereldt dan temptatie
Haer vruecht duert een corte spacie
Corts onvoorsien zijnde ongheuoedt
Gheluck in tswereldts conuersatie
Js puer der sielen condempnatie
Het is al quaet, ey, voghel, broedt
Ten baet gheuedt, ghegadert, gheruedt
Al metten haese ghelt men tghelach
Fortune ghaf niemant noydt sulck gruedt
Die weet wat hem ghebueren mach.
|
|