Rethoricale wercken(1562)–Anthonis de Roovere– Auteursrechtvrij Vorige Volgende Refereyn. DJen oude man mach wel hueghelijck leuen Die by zijnen goeden regimente Den quets der sielen heeft verdreuen Hebbende de doodt voor ooghen als prente Nv leuende op zijn erue oft rente Een droncxken vanden besten smaeckende Eenen penninck houdende tzijnder vente Teghens dat thooftswere is nakende Werm ghecleedt, noydt schuldt makende Saecht ghebedt, voorsien van spijsen Gheleydt, gheheuen, slapende wakende Ende machtich dies, dit machmen prijsen Voorwaer men moet hem eere bewijsen Diet alsoe verre ghebrenghen can Och ionghers peyst om den ouden man. De weluaert die doude heeft vercreghen By goeden regimente voorseydt Js, dat siele ende lichaem zijn vol seghen Telcx noode hebbende ghesondicheydt Die den raedt van loosheden niet verbeydt Die ouerspel met alle crachten vliedt Die zijn broeders voorspoet niet becreyt Die van valschen eeden hem ontsiet Die zijn voeten draecht in dordeelen niet Die zijn handen tot niemants doodt en streckt [Folio 27v] [fol. 27v] Die niemanden min dan tzijne biedt Die zijn tonghe met gheen lueghens beuleckt Dese wordt met gratien soe bedeckt Dat hem Godt int herte zijn glorie ian Och ionghers peyst om den ouden man. Die dus zijnen tijdt passeert in vreden Heeft eere van allen goeden gronden Welck vloeydt vol waerdicheden Want ghy wordt eewelijck verbonden Jn eene goede name, die boven ponden Ende alle tresooren ter wereldt gaet Hy heeft gheloofzaemichede vonden Die van hoirije der eeren naest bestaedt Een goede name is de eerlijcxste graedt Diemen ghewinnen mach opter aerden Want wanneer dlichaem der wereldt laet Soe blijft in hem een name vol waerden Ghemack, eere, weluaert, mach hy aenveerden Die goet regiment van ioncx beghan Och ionghers peyst om den ouden man. Prinche in doude aermoede beseffen Als broodt bidden, oft int gasthuys geuanghen // zijn Die quaet beley ionck hem ghaf topheffen Het moet zijnder herten een swaer verstrangen // zijn Om dwelck ick segghe, laet v tontfanghen // zijn Danckelijck, ende peyst om der miere voort an Ende laet in uwen gheest behanghen // zijn Och ionghers peyst om den ouden man. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij