Rethoricale wercken

Refereyn.

HEbt Darius schadt in patrimonien
Alexanders goedt van Macedonien
Boetius troostinge, Matusalems outheyt
Vroom als de vrouwen van Amazonien
Ende doueruloedtheyt van Babilonien
Vergilius abelheyt, Hercules stoutheyt
Josephs graenderen, Machabeus boudtheyt
Ende bouen Jason bemint bekent
Nochtans verdrijfdy niet drooghaerts coudtheydt
Sonder te latene quaet regiment

Want niet laten is weluaerts desturbauche
Al hadde een Nabugodonosors sauche
Quaet regiment die maecktene mat
Maer wildy hem voeghen ter temperance
Sijn leuen stellende ter ordonnance
Teere naer neere, raedt waer hem wat
Versterffenisse coempt, ofte vinden schadt
Oft rijck houwelijck, dat hielde hem ongheschent
Nochtans weerdet drooghaerts niet en bladt
Sonder te latene quaet regiment.

Magherman, Commere, Rut en Roy
Schoon tooch, Poure der weduwen toy

[fol. 34v]

 

De Ratten sanck metter Nachtegale

 

Te woeckere loopen om wesen moy

 

Lutsen, borghen ten hende schoy

 

Quaet regiment cant altemale

 

Drooghaert is vadere van desen ghetale

 

Hoe langhe dat beydt, tcomt, wacht den hendt

 

Ende om weeren en is Conincx hof noch sale

 

Sonder te latene quaet regiment.

 

 

 

Prinche merckt minste middel en meeste

 

Elck in zijnen staet hoe excellent

 

Sy en verdrijuen nemmermeer drooghaerts feeste

 

Sonder te latene quaet regiment.