Rethoricale wercken

Een andere.

O Godt almachtich ende eewich Regent
Jnde glorie der glorien die niet en hendt
Hoement keert oft wendt,/ tis so bescreuen
Wy sondaren onuerstandighe ende innocent
Die volmaecktelijck int woordt, werck, en consent,
Ons regiment // te sondewaerts gheuen
Hoe sullen wy verantwoorden ons sondich sneuen
Ten wtersten daermen houden sal consistorie

[fol. 35v]

 

Ons besondighe hertkens die moghen wel beuen

 

Verstaende tnaeruolghende woords aencleuen

 

Als bernende keersse lijdt hier ons glorie.

 

 

 

Laet ons ouerpeysen onder ons sondaren

 

Wat wy nv zijn, ende wat wy waren

 

Ende int henen varen // wat wy sullen wesen

 

Laet ons ouerdencken thelsche beswaren

 

De vreeselijcke tormenten ende al dmisbaren

 

En int oordeels verclaren // hoe wy worden verknesen

 

De sondaers versteken, de weldoenders gheresen

 

Ter presentie der maechdelijcker cyborie

 

Laet ons weldoen, wy sullens wel ghenesen

 

Want sustinere als oorconden van desen

 

Als bernende keersse lijdt hier ons glorie.

 

 

 

Wy menschelijcke menschen leuende ongebonden

 

Onse vrije wille, quaet bouen conden

 

Ten diuersschen stonden // brengt ons int net

 

Midts ydel glorie, om claer vermonden

 

Ende broossche natuere gheneghen tot sonden

 

Dies wy noch vonden // worden als ontset

 

Laet ons te godewaerts doen ons ghebet

 

Soe moghen wy van desen crijghen victorie

 

Ach lacen wy hebbent soe diere ghewedt

 

Tdoodt siele ende lijf, wel hier op ledt //

 

Als bernende keersse lijdt hier ons glorie.

 

 

 

Prinche soe men ter werelt daghelijcx siet

 

Al zijn wy nv yet, zaen zijn wy niet

 

Datter meer gheschiet stellet in uwe memorie

 

Maer voorslaechs hoe dat coempt of vliedt.

[fol. 36r]

 

Men weet wiet riet // ick doets bediedt

 

Als bernende keersse lijdt hier ons glorie.