Rethoricale wercken

(1562)–Anthonis de Roovere– rechtenstatus


Constich Lof van Maria op alle de letteren van ABC. AVe Aduocate Aduerterighe Afdoende Afgrijsselijcke Arguatie Adams Aercheyts Absoluerighe Als Alder Aerdichste Abitatie. Bernende Braembosch, Bogaert Bloeyende Blijtst Begheertsele, Belemmertheyt Brekende, Beuallicxste Beelde, Bedruckte Bespoeyende Bestandelijckste Broederlicheyt Bestsprekende. Claerste Corael, Costelijckste Ciborie Cherubinlic Cierlicke Confoorts Conclusie Contemplatiuelijckste Consistorie Coninghinne Corruptien Cracht Confusie. Dauidts Dochtere, Delicaetste Druyue Dagheraet Die Duysterheyt Duycken Dede Duechdelijcke Delbora, Drachtighe Duyue Dierbaer Doormtere Der Drieuldichede. Eersamich Eestere Elckerlijcke Euangeliareghe Eerwaerdich Emmer Eenichste Eerdelijcke Ende Een Eewighe Erue Eenveerdich.
[Folio 55r]
Fortune Fonteyne, Faueurighe Frontiere Frenesie Foortsende Fijnste Figuere Fumeusheyt Fautende Frisschelijckste Fiere Flauherteghen Fruyt Frequenterende Fluere. Gracieuselijckste Goddinne Ghenadich Gedeons Gheluckichste Ghifte Goet Gheerne Ghetrouwe Gheluckich Ghestadich Glorieux Ghelooue Gloeyende Gloet. Hemels Houtaercleedt, Hooghelijckste Hoyrie Hertelijckste Hope Hatende Hwtwendicheyt Herselende Hoouaerdighe Heresie Hebbelijckste Hulpe Huter Hellendicheyt. Ioyeuse Jnghelick Jnspireringhe Jn Jeghenspoede Jonstelijck Jnstrument Jhesus Juechdelijckste Jubileringhe Jolie Jalousicheyt Jnnocent Kerstenlijcke Kercke, Kurieuselijcke Khoor Kieselijck Karboncle, Kennelijck Kristal Kondich Keldere, Karitatelijck Kontoor Kersoude Kestenheydts Korporael. Lof Lichtende Licht, Louelijckste Laudatie Landtschap Leedere Leghere Leterie Liberale Lustelijcxste Lamentatie Liefste Lelie, Lauendre, Lauweriere. Middelarighe Moeder Maecht Marie Mueghenste Marteliaelste Monstrance
[Folio 55v]
Minlijckste Martha, Meeste Melodie Machtighe Medecinaelste Maniance. Noydt Neggligentich Nieuwelickste Naratie Notable Noemy Neerstelijck Net Nobelste Name Noodtvriendtste Natie Nemmermeer Natuerlijcker Nazareth. Onvolpresene Onse Ontweechde Ontslakende Ons Ouerterders Oodtmoedich Ontfaende Ontfaermighe Olye, Onminne Ontmakende Orribel Ouerdicheyt Ouerghaende. Princersse Paradijselijck Palleys Puerste Properheyt, Princhelijck Parcheel Procurerende Plats Princhelijck Pays Precieuselijckste Priesterlijck Prieel. Quader Queteringhe, Quartilerende Querne Quetselijcker Quale Quoadiuture Quintefeulge Quintancelijcker Quinterne Quictende Quelende Quicken Quetsuere. Recht Riergaerde Raeuwer Roeckeloose Rudelijck Regiersel Reyn Reformerende Religieuselijck Reefter, Rijckelijckste Roose Rouweghe Rekeninghe Reparerende. Septer Sconincx, Sethins Schaprade Smakelijckste Smake, Smeekende Sandure Suaders Sacristie, Soetste Sucade Sreynder Sondaren Sepultuere.
[Folio 56r]
Tryacle Teghens Tribulatie Teewighen Tijden Triumpherende Tonder Treckende Torment Temptatie Troosteloose Toeuelijck Trackterende Vrouwe Vanden Vppersten Vriendt Vercoren Victorieux Waerachtich Verheuen Vlammende Vier Vreckheyts Verstooren Verbidt V Weesen Wten Weghe Verdreuen. Xristus xempelicxste xeperientie Xactien xempt xploot xtimerende Xpeerte xalterelicxste xellente Xcommunicatie xcuserende. Ymflammerichste Ysraelite Ymprente Ynnichste Ysaye Yaghende Yeghelijck Ypocrite Ystorieuse Ynwendighe Yherarchye. Zedelickste Zeylinghe Zekerste Zwin Zorchfuldichste Zalue Zondaren Zwinninghe, Zalichste Ziele, Zaechtmoedichste Zin, Zuyuer Zantinne, Zoethertichste Zinninghe. alderLiefste alderWeertste alderRijckste alderMachtichste alderWijste, alderReynste, alderBeste, alderSchoonste alderEdelste, alderZoetste, alderclaerste, aldercrachtichste aldervercorenste, aldereewichste, alderhoochste, aldergeloonste. comPasselijckste, conSerue, comMune, conFectie conSciencelijckste, conFirmatie
[Folio 56v]
conCordantie, conFortelijckste, complexie conDuyt, conTinuele, conFortacie Recht heeft helpe noodt vloeyende zee Om zoetste becleeden dit werck heyscht cracht Ontfaet in dancke dit ABC, Versinnet bet, dan ickt hebbe ghedacht Eewighe glorie lof prijs en macht Rengneert in v vol blijdts beschijns Eerwaerdighe moedere ontfaermt mijns. O Maria soetste ende waertste vrouwe Weest uwen dienare doch beradich Aen v vintmen volmaeckte trouwe Maer al dat leeft, is onghestadich. Wat is ons in ons leuen serft Wat heeft den tijdt in zijn beuanck Dan Winter, Somer, Lenten, Herft Staet drooghe, groene, cort of lanck Heden vast staende, en morghen cranck Slapen, waken, serf ende vry Leuen, steruen, naer wercken danck Wel hem die wel gheboren sy. Op ende nedere, drooghe ende wack Hitte ende coude, Ebbe ende vloedt Solaes of rouwe, aerbeydt ghemack Weelde aermoede, quaet oft goedt Stoutichede bloodthede, sot oft vroedt Eten, drincken, vruecht ende misval Wie heeft van gratien sulcken spoet
[Folio 57r]
Die weet wat hem ghebueren sal. Verborghen ist in Gode alleene Sijn wonderlijck werck en heeft gheen ghenoodt Sulck die was worden groot, is worden cleene Ende sulck was cleene, is worden groot Die sulcke is nv van hauen bloodt Hy hadde tghelts meer, ende schadts dan wy Dus loopt der auontueren cloot Wel hem die wel gheboren sy. Sulck gaet ter zee, hy en vindt gheen watere Een pluyme doet sommighen man verdriet Sulck heeft van weelden al den snatere Hy en weet een mijtsweert vroeschap niet De sulck is vroedt ende scherp toe siet Maer ten helpt hem groot noch smal Den sulcken coempt gheluck sonder bediedt Wie weet wat hem ghebueren sal. Wel gheboren naer der lettere Dats groote edelheydt diet soe verstaet Maer zijn gheluck dat is veel vettere Die goede complexie van Gode ontfaet Ghepeysen, wille, ende daer toe daet Soe die Planeten ons brenghen by Van desen seydtmen sonder verlaet Wel hem die wel gheboren sy. Hy mach in zijne gheboorte verblijden Die schoone ghesonde leden heeft Met rechten stelt hy oock druck bezijden
[Folio 57v]
Aen wien tbeuoelen van redenen cleeft Maer wie buyten quader auontueren leeft Mach oock wel drijuen blijde gheschal Die gratie van bouen veel wonders gheeft Wie weet wat hem ghebueren sal. Ende om te schouwen veel arguatien Complexie ende elementen mede Planeten, teeckenen, tis al vol gratien Wies Godt ons oydt hier wassen dede Maer Adams groote ouerhoorichede Was wortele ende maeckte ons leydts ghecry Doch heeft elck teecken zijn proper zede Wel hem die wel gheboren sy. Niemant en is soe wijs op eerden Niemant en heeft sulck regiment Niemant en staet in sulcker weerden Niemant en is soe hooghe bekent Niemant en is soe excellent Sijn doen en mach verkeeren al Niemant en leeft tsy siende of blendt Die weet wat hem ghebueren sal. Iherusalem, Roome ende Troyen die stadt Waren schoone met menschen handen ghewracht Nochtans zijn sy wien wondert dat Met handen weder te nieten bracht Hy is sot die soe is bedacht Wel staende, ende waent soe blijuen by Fortune heeft menighen voortijdts vercracht Wel hem die wel gheboren sy.
[Folio 58r]
Coninck Dauidt die hooghe Prophete Verdooolde, soe ons de schriftuere leerdt Salomon wijs, vol alder wete Wie waendes, zijn schande was oock ghemeert Ysaias ende Manasses gheEert Coninghen, ende inder Propheten ghetal Dese doolden, maer sy zijn weder ghekeert Wie weet wat hem ghebueren sal. Of dese verdoolde ende andere vele Wat wonder ist dat wy aerme slichte By cranckheden of by natueren spele Dickent verdolen wten lichte Eest Oom, Moeye, Neue of Nichte En segt tot niemandts leuen tfy Vest mijns segghens in v ghesichte Wel hem die wel gheboren sy. Ick hebbe ghekent beyde ionck ende oude Die hadden eens anders leuen beschamen Maer sy quamen nae ter seluer voude Eer twee of drie Jaren eynde namen Elck mensche sal hem wachten van blamen Ende medelijden in eens anders misual. Der werelts leedere, is broosch van tranen Wie weet wat hem ghebueren sal. De auentuere is wel sulcx vriendt Sulck werdt om cleyne sake onterft De sulck heeft zeuen dooden verdient Die nochtans thende opt bedde sterft Maer wie een goede gheboorte verwerft
[Folio 58v]
Ende daer naer leeft, verstaet wel my Die mach wel segghen, tot hem diets derft Wel hem die wel gheboren sy. Ick bidde v allen die dit hoordt lesen Siedy yemandt dolen oft wten weghe Wildt zijns met compassien ghedenckich wesen Biddende Gode om gratie ende seghe Op auontuere oft yemandt ghecreghe Een bede aen hem daer noyt sin en qual De sulck mist, hy waent ghaen te deghe Wie weet wat hem ghebueren sal.

Vorige Volgende

Constich Lof van Maria op alle de letteren van ABC.