Rethoricale wercken

Maria ghecompareert bijder Roose.

ALle de bloemkens diemen siet
Nv spruyten groot oft cleyne
Ende en hebben een twint ghelijckens niet
Bijder Roose alleene
Ende soe ist metten santen ghemeene
Die in hemelrijck Gods lof aenhooren
Daer is Maria als Rooze reene
Bouen alle Enghelen, Heylighen wtuercoren
Al dat van moedere is gheboren
Ter noodt onder haren mantele vlucht
Dees willen wy minnelijck tsegghene sporen

[fol. 61v]

 

Lof Roose ghebenedijde vrucht.

 

 

 

Van allen bloemen de medecinaelste

 

Datte is die edel Roose

 

Dus is Maria die principaelste

 

Beschudt voor allen noose

 

Want bouen alle text oft gloose

 

Js sy ghegroeyt in glorien

 

Ghebruyckende sonder tijdt oft poose

 

Jn eeuwelijcker memorien

 

O Maria verheuen boven alle Ciborien

 

Daer de helle gheheelijck voren ducht

 

Men mach wel segghen in uwer victorien

 

Lof Roose ghebenedijde vrucht.

 

 

 

Gheen bloeme en is soe lief om schouwen

 

Noch soe vriendelijcke van coluere

 

Dus is Maria Bouen alle vrouwen

 

De alderheylichste creatuere

 

Vol minnen ende van soeter guere

 

Daer wy haer hertelijck troost by vaten

 

Jnde middele, tsaet van goude puere

 

Dats therte vol bernender charitaten

 

Ghelijck de Roose vry coempt te baten

 

Hem die quelt by hittigher sucht

 

Soe coelt Maria alle sondighe staten

 

Lof Roose ghebenedijde vrucht.

 

 

 

¶ Princersse.

 

Maria roode Roose ghebenedijdt

 

Moedere zijnde van onsen Heere

 

Die Coninghinne der glorien zijdt

 

Gheduerich, faelgierende nemmermeere

[fol. 62r]

 

Jck bidde v oodtmoedelijck seere,

 

Dat ghy ons wildt bijstaen ter noodt

 

Dat elck onslieder ten besten keere

 

En ontdolen moeten die eewighe doodt

 

Ghy hebt de macht schoone roose roodt

 

Neempt onslieden in hoeden op uwen plucht

 

Want saligher bloeme Godt noydt gheboodt

 

Lof Roose ghebenedijde vrucht.