Rethoricale wercken
(1562)–Anthonis de Roovere–
Auteursrechtvrij
[Folio 76r]
| |
Den ghenen die hem gheen duecht en ian
By redene, daer is groote weldaet an
Hoe wel contrarie seecht natuere
Die onrecht werckt dat heet een man
Maer faictelijck soe ist teghens schriftuere
Weert swaer ghenoech valt ende stuere
Hem wien voor Juge last ghebuere
Men vinter vele wient valt te suere
Dies segge ic om dat gods wille hier vruecht / voet
Godt mint hem die zijnen vyant duecht // doet.
Dye niet en acht op lueghen tappers
Die Schimpers, Nijders can vermijden
Dye niet en ghelooft op achterclappers
Die ondercruypers niet en ghelijden
Die quaey nieumaren can steken bezijden
En de sulcke voor min dan niet en telt
Die roeringhe, last, can tonder strijden
Die stoockviers van twiste met minnen velt
Die int beste keert al watmen relt
Ende bouen dien niet voort en stelt
Dan pacientie in zijn ghewelt
Jck mach wel segghen hoet my noch ieucht // spoet
Godt mint hem die zijnen vyant duecht // doet.
Bemintene Godt, ach iae hy sekere
Schriftuere heeft dickwils dat gheleden
Aen tcruyce en wildy dan zijn gheen wrekere
Van hem die hem de doodt aen deden
Maer badter vooren met innicheden
Waer moghen wy schoonder exemple winnen
Figueren zijn ouer duysentich steden
| |
[Folio 76v]
| |
Men beueeltse clerckelijcke sinnen
Die vriendtschepe haren vyandt beghinnen
Dats dalder opperste deel van minnen
Bernende ghelijck de Cheraphinnen
Daer de drijevuldicheyt inne verhuecht // soet
Godt mint hem die zijnen vyant duecht // doet.
Prinche uwen vyandt mint sonder sneuen
Bid ick als nv, soe en ghijt vermuecht // doet
Ghy coempter by int eewich leuen
Want God bemint hem die zijn vyant duecht // doet.
|
|