Rethoricale wercken(1562)–Anthonis de Roovere– Auteursrechtvrij Vorige Volgende Refereyn ende Lof van Maria. O Weertste, o goede // die Godt soe goedede Met hemelscher hoede // ende soe behoedede, Dat v is bleuen // Gods moede tzijne Lof reynste van moede // die noydt en moedede Van Yeuens bloede // die al bebloedede Hebdy ghegheuen // puer medecijne Ghy zijdt de vroede // diet al bevroedede By Lucifers broede // die op ons broedede Bitterlijck sneuen // ende helsche pijne Want die v voede // noydt niemant en voedede Tot sulcken spoede // want hy v spoedede Alleene verheuen // ten hoochsten schijne Dies zijdt gheschreuen // een goddelijcke schrijne Bereedt te lauene // alle die mestermen Lof seker hauene // tsondaers beschermen: Hoe soude ickt schrijuen // het is onschrijuelijck Want v beclijuen // is soe beclijuelijck [Folio 77r] [fol. 77r] Dat ghy vrouwe der vrouwen // weert blijft ende zijt Ende wy kattijuen // zijn soe kattijuelijck Waere v verstijuen // ons niet verstijuelijck Wy bleuen in rouwen // teewigher tijdt Voor alle wijuen // noydt gheene soe wijuelijck Wie ons ontblijuen // ghy zijt bijblijuelijck Als trouwe der trouwen // diet al bevrijdt Al v bedrijuen // is sdruckx verdrijuelijck Vwe wechs gherijuen // valt soe gherijuelijck Dat in v schouwen // Gods siele verblijdt Doet op ons dauwen // Gods gratie wijdt Die hier met slauene // in vreesen swermen Lof seker hauene // tsondaers beschermen. Hoe wijs, hoe condt // tgaet bouen conden Dijn weerdicheyts grondt // is sonder gronden Ten mochte ghedencken // noydt gheen ghedochte Noydt sterffelijck mondt // mocht al vermonden Noydt herte bestondt // te gheenen stonden Tmoeste hem ontsincken // hoe hijt besochte Noydt schadt noch pondt // en mochte vol ponden Der gratien vondt // by v gheuonden Die ons dranck drincken // van glorien brochte Ghy onghewondt // gheneest alle wonden Ghy ghesondt // doet den onghesonden Sijnder siecheyt mincken // dwelck niemant plochte Wilt ons beschincken // in daerdtsche crochte Met uwen beghauene // ende moederlijck vermen Lof seker hauene // tsondaers beschermen. Princersse vredich // en dalder vredichste Pijndt my te grauene // binnen uwen bermen [Folio 77v] [fol. 77v] Jck segghe v sedich // als dalder sedichste Lof sekere hauene // tsondaers beschermen. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij