Rethoricale wercken

(1562)–Anthonis de Roovere– rechtenstatus



[Folio 78v]
Gheestelijcke Bueckelare. VVie is dien Coninck, hoe groot zijn staet Wie is dyen Prinche, hoe vroom zijn daet, Wien is die Bisschop ofte Prelaet Wie is dyen Riddere oft Edelenman Wie is die Borghemeester, Schepene oft Raedt Wie is die Taelman ofte Aduocaet Wie is die Poortere oft Ambachts maet Die hem van lijdene ghehouden can Al dat van moedere oydt lijf ghewan Dat vloeydt in lijdene Soe is ons grootelijck van nooden dan Daer teghens te strijdene Dies gheef ick v teenen bevrijdene Een Bueckelare, ende een snijdende sweert Elck sie dat hy hem vromelijck weert. Want wy ellendighe hier beneden zijn Ter plecken daer niemant en mach met vreden zijn Maer sonder ophouden wy bestreden // zijn Eenpaerlijck veel sielen en diuerssche lijuen Oft Cloosters, Dorpen, Landen oft steden // zijn Sy duncken my met drucke soe doortreden // zijn Met ouerlaste soe deerlijck doorreden // zijn Dat wonder is datmense siet staende blijuen Maer want elck salich is int beclijuen Verduldich te zijne Soe behoordtmen den lijdene naer mijn schrijuen Ghehuldich te zijne Voorwaer wy zijnt al schuldich te zijne Daer in verdienen wy soot Godt begheert
[Folio 79r]
Elck sie dat hy hem vromelijck weert. Schade van goede te watere te lande Schade van oorloghe, schade van brande Schade van sterften, aermoede, schande Schade van tfenijn der helscher tonghen Ghebreck van vriendelijcken bestande Passien ende sieckten, menigherhande Wederspoet by onvoorsienighen vyande Onverdient, ghevanghen, ghequetst, bedwonghen Dit coempt van buyten ons aenghespronghen Dickent ten Jaere, Hier teghens houdt vast in de handt ghewronghen Den Bueckelare Van Pacientien, met blijden ghebare De Handthaue heet Hope, diet al verteert Elck sie dat hy hem vromelijck weert. Al datmen mach op deerde lijden Die metten Bueckelare wel can strijden Alle tribulatie is hem een verblijden Ende hy verwindt zijn vyanden al Ende Godt almachtich laet op hem glijden Sijnen hemelschen troost, dat van bezijden Hem bevloeyen der weeldighe tijden Schriftuere ende exemple sonder ghetal Dauidt ende Job die al dmisual Te bouen quamen Ende alle maertelaers die groot en smal Vromelijck namen Den Bueckelare, dies is haer versamen Jn glorien, daer men alle druck ontbeert
[Folio 79v]
Elck sie dat hy hem vromelijck weert. Maer nv moeten wy sterck sonder vertsaghen Den berch van houerden van ons veriaghen Schouwende den put onreyne van laghen Ende tbernende van ghierigher weghen Want dit zijn inwendich der sielen plaghen Hier moetmen vleesch ende bloedt voor waghen Ende inde rechter handt tsweert gaen draghen Om tsvyants temptatie te vallene tseghen Dwoordt Gods, soe heet dit sweert vol seghen Ende Godt is dwoordt Eens nieu gheboren als kinderkens pleghen Om ons confoort Laet ons dwoordt Gods aenroepen voort Gheen sweerdt, dat meer dan vyandt deert Elck sie dat hy hem vromelijck weert. Dwoordt Gods doet ons selue bekin Leerdt van my dat ick oodtmoedich bin Neempt oock gheen ouerspel inden sin Reyn herten die sullen Gode sin Steeckt v den vyant ghiericheyt in Merckt dwoordt Gods van deerste beghin Waer hadde oydt creatuere min Salicheydt sal den aermen van gheeste gheschien Neempt vry dit sweerdt, dy sal ontvlien Tsvyants temptatie Gulsicheydt, Traecheyt, negheen van dyen En hebben statie Jn dy, als ghy aenroept de godts gratie Nijdt noch gramschap, noch al tgheveert
[Folio 80r]
Elck sie dat hy hem vromelijck weert. Dwoordt Godts neempt voor v sonderlinghe Staet op ghy doode ende coempt gheringhe Ten oordeele, daermen tlaetste ghedinghe Houden sal, ouer goede ende quade Daer van als ghedaen wordt rekeninghe Met beuende leden met handen ghewringhe Daer ondersocht wordt int ghedringhe Elckerlijcx leuen, ghewin ende schade Neempt hier dwoordt gods, twordt daer te spade, Ghaet vermalendijde Jnt eewich vier, daer gheen ghenade Last heeft van tijde Gordt dan dese wapene, onder v zijde Soe rijdt siele ende lijf een salich peert Elck sie dat hy hem vromelijck weert. Met dese wapene stichtelijck vermaert Bid ick v, siele ende lijf verwaert Peyst om den langhen henenvaert Daer nemmermeer en is wederkeeren Vergheeft my maeck ick u beswaert Het coempt wt rechter compassien aerdt Jck en doet niet om te zijne gheopenbaert Wel my, const ickt my seluen leeren Dit nieuwe Jaer wil v Godt vermeeren Jn salicheden Neempt in dancke tis touwer eeren Simpelijck besneden Doch de verstandighe zijn haest te vreden Bidt voor my dat ick noch worde expeert
[Folio 80v]
Naer dat wy al strijden inde aerdtsche steden Elck sie dat hy hem vromelijck weert.

Vorige Volgende

Gheestelijcke Bueckelare.