Rethoricale wercken

Lof van Maria bijder Lelie.

DYn macht, dijn prijs, dijn lof, dijn weerde
Dijn preuilege eewich ende vrij
En mach vollouen hemel noch aerde
Ey lacen wat salt dan wesen van my
Want soe heeft hem Godt vernedert in dy
Jae in dijn maechdelijck lichame claer
Dat hy sonder mensche gheen Godt en sy
Noch mensche sonder Godt voorwaer
Doch en is de Godtheydt, dats openbaer
De menscheydt niet, te gheenen sinne
Noch de menscheyt en is verre noch naer
De Godtheyt niet, hoement beghinne
Door tverwondert van desen biedtmen dy minne,
Maria segghende met blijden schijne
Lof Lelye doorvloeyende medecijne.

Godt ende mensche, dese twee zijn een
Persoon, nochtans natueren twee
Onvermindert elcx deel, ende wesen reen
Euen gheweldich emmermee
Ende du zijdtst de Lelie witter dan snee
Door wien dit groote wonder ghevloeydt // es
Gheluck als vander hoochster zee
Alle aerdtrijcke versch ende bespoeyt // es
Het goudt van charitaten ons ghegroeydt // es
Jn dy, dat al ons sieckte veriaecht heeft
Tleuen nv bouen de doodt ghebloeydt // es
Want deeuwighe sonne dy bedaecht heeft

[fol. 81r]

 

Tverloren is vonden by v die maecht // bleeft

 

Ende Moeder wert, net sonder pijne

 

Lof Lelie doorvloeyende medecijne.

 

 

 

De Olye van Lelyen die doordrinckt

 

Tgheswelsel van alle quade humueren

 

Maer ghy Moeder, ghy zijdt die olye schinckt

 

Der ontfaermherticheydt allen creatueren

 

Gheen medecinaelder, gheen meerder van cueren

 

Gheen hoogher van aerdtscher weelden rijsende

 

Gheen bloeme op aerden soe crachtich van guere,

 

Gheen suyuerder in ghetempertheden prijsende

 

Gheen plante en is sulck soetheydt wijsende

 

Gheen spruyte en is soe confortatijf

 

Gheen soeter en is meer den hongher spijsende

 

Want ghy Maria, troost siele ende lijf

 

Ghy zijdt de Lelye ons leedts verdrijf

 

Door wyen Godt verkeerde water in wijne

 

Lof Lelye doorvloeyende medecijne.

 

 

 

Princersse.

 

Der hemelen, der Enghelen vrouwe

 

Der hellen ghebiedighe tallen termijne

 

Ontfermt mijns alder ghetroutste trouwe

 

Reyne Lelye doorvloeyende medecijne.