Werken. Deel III

[p. 41]

* Slot. Het vierde element van het volmaakte leven: algenoegzaamheid. *

Die mensche die ute deser hoocheit van gode <neder>¹⁾-ghesent wert inde werelt, hi es volder waerheit, ende rijcke van allen doechden. Ende hi en soeket sijns niet, maer des-gheens eere diene²⁾ ghesonden heeft. Ende daer-omme es hi gherecht ende warechtich in allen dinghen. Ende hi heeft eenen rijcken melden³⁾ gront, die ghefondeert es inde rijcheit gods. Ende daer-omme moet hi altoes vloeyen in alle die-ghene die sijns behoeven; want die levende fonteyne des heilichs gheests die es sine rijcheit diemen niet versceppen en mach⁴⁾. Ende hi es een levende willich <instrument>⁵⁾ gods daer god mede werct wat hi wilt ende hoe hi wilt; ende des en dreecht hi hem niet ane⁶⁾, maer hi gheeft gode die eere. Ende daer omme blijft hi willich ende ghereet al te doene dat god ghebiedt; ende sterc ende ghenendich alt⁷⁾ te dogene ende te verdraghene dat god op hem ghestaedt. Ende hier-omme heeft hi een ghemeyn leven; want hem es scouwen ende werken even ghereet, ende in beyden es hi volcomen. Want niemen en mach dit ghemeyn leven hebben, hi en si <een>⁸⁾ scouwende mensche; ende niemen en mach scouwen noch gods ghebruken hi en hebbe dese .vj. poente in hem alsoe gheordent als icse hier vore seide⁹⁾. Ende hier omme sijn alle die bedroghen die wanen scouwen, ende eenige creatuere onordelijc minnen, oefenen ocht besitten; die ghebruken wanen eer sy onghebeelt zijn, ochte rasten eer si ghebruken. Dese zijn alle bedroghen. Want wij moeten te gode ghevoecht zijn met opender herten, met ghevreeder conzienciëen, met eenen bloten aenschyne, ongheveynsdelijc in rechter waerheit. Ende dan zelen wij opgaen van duechden in duechden, ende gode bescouwen ende sijns ghebrucken ende in hem één werden ghelijckerwijs dat ic u gheseghet hebbe. Dat ons <allen>¹⁰⁾ dit gheschie, dies helpe ons god. Amen.

1) Om. F.

2) Die hem.

3) Milden.

4) Kan.

5) Strument F.

6) Van anedragen.

7) Al dat.

8) Om F.

9) Blz. 39.

10) Om. F.