Boeck van surgien

Capm. vanden aersdarme die uutgaet.

Longaen dat is den aersdarm ende gaet som den luden uut ende aldergerinxte den jonghen kinderen ende dat coemt van groter persen datse hem te zeer voeden. Of hi mach uutgaen omdat die laceerten van hem siin ghelaxeert ende dat is paralicis ende dan en ghevoelen siis niet als hi uutgaet ende somstont gaet die stront mede uut. Ende dit onghemac sal men cureren met medecinen constrictiif. Sij sullen sitten in water daerin

[p. 212]

ghesoden sal siin balaustie psidia glandes gallen sumac arnoglossa ende dies gheliic. Ende daerna salmen den darm salven met pix liquida of met sade van malven. Dat dic [ende] viscois is ende met olien van oliven. Ende dan doeten weder in ende ruetten met der stiptigher medecinen ghemaect ende stroijt daer op den steertbeen ende inden aers het es herde goet daertoe.