Emblemata

Honori eruditissimi modestissimique Iuvenis D. Iacobi Realij P.F. cum publicè Lug. Batav. Theses juridicas proponeret.

PRudenter ille Rector & rerum parens,
Probo cuique candicantes gloriae
Insevit ignes, quos flabello provido
Dictator ille terrei corpusculi

[p. 241]

 

Ratio fovere debet, & rectâ viâ

 

Virtutis, altum promovere ad aethera;

 

Divina namque mens licet suo sibi

 

Placeat theatro, quatenus coeli sui

 

Est aemulatrix, atque simplex, attamen

 

Honorem anhelat magna quatenus viget.

 

Hinc ardor ille Heroicus spernens moras,

 

Insueta tentat, seque vix velox capit,

 

Temnique censet dulce Virtutis decus

 

Contempto Honore. Testis es magno patre

 

Condigne Fili; qui perustus Gloriae

 

Calore; dignum laude certamen subis,

 

Redisque victor, non superbus sanguine,

 

Sed pulchriori Gloriae fulgens face.

 

At heus monendus hoc tamen discas velim,

 

Insiste pugnae huic, ne remitte spiritus,

 

Facessat omnis torpor, & pigrum pecus

 

Fucos habere res suas sibi jube:

 

Hi namque sese putrido fixos solo

 

Foedè remittunt, nescijque originis

 

Populare menti nobili imponunt jugum,

 

Virumque funus ambulant, donec solum

 

Ilos reposcat, nilque praeter spiritus

 

Abominandos naribus linquunt suis.