Emblemata

Nobilissimi, doctissimique Iuvenis D. Bartholdi Wicheringij albo inscriptum.

NObilitas, splendorq́ue patrum, quos ardua virtus
Extulit, & quorum, jam tot labentibus annis,
Fama viret, natos, & qui nascuntur ab illis
Admonet, ut laudes partas insignibus ausis,
Accumulent virtute novâ, ne monstra, suaeque,
Degeneres fuci, fiant injuria gentis:
Sed miseros persaepè patres spes lactat inanis,
Dum soboles nimium generis suffulta nitore,
Egregiumq́ue, putans per testamenta relinqui

[p. 242]

 

Nomen; in obscuras detrudit pulchra tenebras.

 

Gesta patrum, nilque ipsa animo laudabile volvit,

 

Sic Heros quondam, domitis agnomen ab Afris

 

Cui virtus invicta tulit, splendoris acerbam

 

Pertulic eclipsim in nato, praeclaraque magni

 

Facta patris, sobolis crimenque, & stigma fuerunt.

 

At te flos juvenum, quem quondam cura benigni

 

Sideris, & placido viderunt lumine Parcae;

 

Mens alia impellit: nam famae incumbere patrum

 

Vile putans; proprio gestis splendere nitore,

 

Non secus ac quondam generosi seminis infans

 

Magnus Alexander, fertur doluisse, parentem

 

Omnia jam vicisse, sibique haud esse relictum

 

In quo virtutis propriae queat edere signum.

 

Macte animi Iuvenis, semperq́ue hanc comere partem

 

Perge tui, quae, cum vicientur cuncta senectâ,

 

Emicat, & longis vires sibi sumit ab annis.