Nieuwe testament (Noordnederlandse vertaling)

II

Doe Ihesus gheboren was in Betlehem Jude in coninc Herodes daghen, sich die coninghe quamen uut Oestlant tot Iherusalem ende vragheden: Waer is hi, die gheboren is een coninc der Joden? Wij hebben sine sterne ghesien in Oestlant ende sijn ghecomen, hem mit gaven aen te beden Doe dat die coninc Herodes hoerde, wart hi versaghet of bedroevet ende al Iherusalem mit hem, ende vergaderde alle die princen der priesteren ende die scriben des volx ende ondersochte van hem, waer Cristus gheboren solde warden. Si antworde hem: In Betlehem Jude, want alsoe is bescreven vanden prophete: Ende du, Betlehem, lant van Juda, en selste die minste niet wesen in die heerscapie van Juda, want wyt di sal comen een hertoghe, die mijn volc van Israhel regieren sal. Doe riep Herodes die coninghe al heymelic tot hem ende vernam neerstelic van hem die tijt der sterren, die hem luden apenbaerden, ende seynde se in Betlehem ende seyde: Gaet ende vraghet vlitelic nae den kijnde, ende als ghit ghevonden hebt, ontbiedet mi, op dat ic dan mach comen ende aenbedent oec. Doe si den coninc hadden ghehoeret, ghinghen si heen ende siet, die sterne, die si ghesien hadden in Oestlant, ghinc voer hem al tot si quamen ende ghinc staen recht boven daer dat kijnt was. Doe se die sterne saghen, worden si seer verblijt in groter vrouden ende ghinghen int huus ende vonden tkijnt mit Marien sijnre moeder, ende nederbueghende aenbeden si dat kijnt ende oploken hore

[fol. 4r]

scatte ende offerden hem gaven: golt, wieroec ende mirre. Ende si ontfinghen een antworde in horen slape, dat si niet wederkeren en solden tot Herodes, ende bi enen anderen weghe sijn si weder ghekeert in hoer rike.

Doe dese coninghe heen waren, apenbaerdem die enghel des Heren Joseph in sinen slaep ende seyde hem: Stant up ende nemt tkijnt ende sijn moeder ende vlie in Egipten, ende wes daer alsoe langhe toe ic di segghen sal, want het is toecomende, dat Herodes dat kijnt sal soeken om te doden. Hi stont up ende nam dat kijnt ende sijn moeder des nachtes ende ghinc neder in Egipten ende was al daer tot Herodes starf dach, op dat vervullet worde vanden Heer dat ghesproken was doer den prophete, die seyde: Uut Egipten heb ic minen sone gheroepen.

Doe Herodes sach, dat hi bedroghen was vanden coninghen, wart hi harde gram ende sende ende versloech alle die kijnder, die in Betlehem waren ende in allen den eynden daer omtrent van tween jaren olt of daer beneden nae der tijt als hi vernomen hadde vanden coninghen. Doe wart daer vervullet dat ghesproken is overmids den prophete Jeremias, die sprac: Die stemme vele wenens ende screyens is ghehoert in Rama, dat is int hoghe: Rachel wenende om hoer kijnder ende en wilde niet ghetroestet wesen, want si en sijnt niet.

Doe Herodes doet was, verscheen die enghel ons Heren Joseph in sinen slaep in Egipten ende seyde: Stant up ende neemt tkijnt ende sijn moeder ende ganc int lant van Israhel. Si sijn begraven, die dat leven des kijndes vervolgeden. Hij stont up ende nam tkijnt ende sijn moeder ende quam int lant van Israhel. Doe hi hoerde dat Archelaus regnerde in Judea voer Herodes, sinen vader, ontsach hi hem daer te gane. Ende hi wert vermaent in sinen slaep ende ghinc neder int lant van Galileen ende quam ende woende in eenre stat, die Nazareth hiet, op dat vervullet worde dat overmids den prophete ghesproken is, want hi sal Nazarenus gheheyten werden.