Nieuwe testament (Noordnederlandse vertaling)

XXVIII

Die ierste marghenstonde, die daer lichtende wart des irsten daghes vander weke, quam Maria Magdalena ende die ander Maria om dat graf te besien. Ende siet, een groet eertbevinghe ghesciede daer, want die enghel des Heren quam neder vanden hemel ende ghinc totten grave ende wentelde den steen af ende ghinc daer op sitten. Sijn ghesichte was als een blicsum ende sijn cleder als die snee. Overmids vresen van hem waren die wachters verveert ende worden recht ondaen als doden. Die enghel antworde ende seyde den wiven: En ontsiet u niet, want ic weet dat ghi Ihesum sueket, die ghecruest is. Hi en is hier niet, mer hi is opghestaen als hi seyde. Coemt ende besiet die stede, daer die Heer gheleyt was. Ende gaet haestelic ende segget sinen jongheren dat hi opverstaen is. Ende siet, hi gaet voer u in Galileen, daer suldien voer\sien,

[fol. 20r]

als hi u gheseyt hevet. Ende si ghinghen haestelic uut den grave mit vresen ende mit groter vrouden ende liepen ende boetscapten dat sinen jongheren. Ende sich, Ihesus liep hem te ghemoete ende seyde: God gruet u. Si quamen doe tot hem ende hielden sijn voete ende aenbeden hem. Doe seyde Ihesus tot hem: En ontsiet u niet. Gaet ende boetscaptet minen brueders, dat si gaen in Galileen, daer sullen si mi sien.

Doe dese en wech ghegaen waren, quamen sommighe vanden wachters in die stat ende boetscapten den princen der priesteren al dat daer ghesciet was. Doe vergaderden si mitten ouden ende namen enen raet alsoe dat si den ridders veel ghelds gaven, ende seyden: Segghet dat sijn jongheren des nachtes quamen ende hebbene ghestolen, doe wij sliepen. Ende als dat vanden richter ghehoert wort, dan sollen wij hem raden ende ju al vri maken. Ende si namen dat ghelt ende deden alsoe als si gheleert waren.

Ende dit woert is aldus apenbaer ghemaect onder die Joden al opten dach toe van huden.

Doe ghinghen die eelf jongheren in Galileam inden berch, daert hem Ihesus ghewijst hadde, ende si saghene ende aenbeden hem, mer sommich van hem twivelden. Ende Ihesus quam tot hem ende sprac hem toe ende seyde: Mi is alle moghentheyt ghegheven inden hemel ende inder eerden. Daer om gaet ghi ende leert alle dat volc ende doepse inden name des vaders ende des soens ende des Heylighen Gheestes ende leert hem, dat si houden allet dat ic u gheboden hebbe. Ende siet, ic bin mit u alle daghe al totter werlt eynde toe.

Hier eyndet sunte Matheus ewangelium in Duutsche alsoe alst inden Latijn bescreven is.