Nieuwe testament (Noordnederlandse vertaling)

V

Ende ic sach een boech binnen ende buten bescreven in die rechterhant des sitters opten throne, gheteykent myt seven zeghelen. Ende ic sach enen starken enghel, ropende mit luder stemmen: Wie isses weerdich den boec op te luken ende sine bekenninghe te ontbinden? Ende nyeman, noch inden hemel noch in der eerden, noch onder der eerden en mochten den boec opluken noch aen scouwen. Ende ic weende seer, want daer niemant ghevonden en was weerdich dien boech op te doen noch te sien. Ende een van den oelden seyde my: En ween niet, sich, die lewe van den gheslachte Juda, Davids wortel, hevet verwonnen den boec op te luken ende sijn seven zeghelen te ontlossen.

Ende ic sach ende sich, int middel des thrones ende dier vier diere ende in den middel der oelden een lam staende, recht oft verslaghen ware, seven hoernen hebbende ende zeven oghen; dat sijn die zeven gheeste Godes, ghesendet in alle tlant. Ende dat lam quam ende nam dat boec uytter rechter hant des ghenes die opten throne sat.

Ende want hy den boec op loec, soe vielen die iiii diere ende die xxiiii oelde neder voer den lamme ende si hadden alle herpen ende vedelen vol gueder roeken; dat sijn der hilghen ghebede. Ende si songhen

[fol. 165v]

enen nyen sanc ende seyden:

Here God, du biste weerdich toe nemen dat boec ende sijn seven zeghelen op te doen, want du biste verslaghen ende du hebste ons in dinen blode Gode verlosset van allen gheslachten ende tonghe ende gheboerte ende volke, ende du hebste ons onsen God een rijc ghemaket ende priesteren, ende wy sullen regniren opter eerden.

Ende ic sach ende hoerde een stemme van vele enghelen in den ommeghanc des thrones ende der diere ende der oeldere, ende haer ghetal was dusentich dusent, ende riepen mit groter stemmen:

Dat lam, datter verslaghen is, is weerdich tontfanghen moghentheyt ende gotheyt ende wijsheyt ende starkicheyt ende ere ende glorie ende benedijnghe.

Ende alle creaturen die in den hemel sijn ende opter eerden ende onder der eerden of die in der zee sijn, alle hoerdichse den ghenen toe segghen, die in den throne sat, ende den lamme benedijnghe ende ere ende glorie ende moghentheyt in ewen toe ewen.

Ende die vier diere seyden: Amen. Ende die xxiiii oelde vielen op hoer aensichten neder ende aenbeden den levenden in ewen toe ewen. Amen.