Nieuwe testament (Noordnederlandse vertaling)

XI

Ende my is gegheven een ghescrifte mit eenre pennen ghelijc eenre roede ghescreven, segghende: Stant op ende mit den tempel Godes ende den altaer ende die daer in beden. Mer die vrijthof, die buten den tempel is, die warp uyt ende en metes niet, want hi is den heydenen ghegeven, ende si sullen twe ende viertich maende die hilghe stat vertreden ende ic sal mynen tween ghetughen gheven, dat si prophetiren sullen, ghecledet mit zacken, dusent twehondert ende sestich daghe. Dit sin twe olive bome ende twe candalaers, staende in die theghenwordicheyt des Heren der eerden. Ende ist dat se yemant deren wille, soe salre een vuer uyt haren monde ghaen ende sal haer viande verslinden, ende ist dat se yemant quetsen wil, dien behoert alsoe verslaghen toe waerden. Dese hebben macht den hemel toe sluten, dat in den daghen haere prophezien niet en regene, ende si hebben macht over die watere, die toe verwandelen in blode ende die eerde te castien mit alre plagen, alsoe dicke alsi willen.

Ende alsi hoer ghetughe gheeyndet hebben, dan sal die beeste die uytten afgronde op clam, enen strijt jeghens hem maken ende salse verwinnen ende verslaen. Ende haer lichaem sullen ligghen in den straten der groter stat, die gheestelic gheheten is Sodoma

[fol. 169v]

ende Egiptus, daer haer here oec ghecruyst is. Ende somich van den volke ende van den gheslachten ende van den tonghen ende van den heydenen sullen drie daghe ende enen halven haer licham sien ende men sals niet ghehenghen haer lichame in die grave te legghen. Ende die, die opter eerden wonen, sullen verbliden van dien ende vrolic wesen ende malcander gave senden, want dese twe propheten hebben si ghecruset, die opter eerden wonen.

Ende nae twe daghe ende enen halven sal die gheest des levens, van Gode ghesant, in hem comen, ende si stonden op haer voete ende grote vrese viel op die ghene die se saghen, ende hoerden een grote stemme van den hemel, segghende tot hem: Climmet haer op! Endi si clommen in den hemel in den wolken, ende haer viande saghense.

Ende in die uren ghesciede ene grote eertbevinghe ende dat tiendendeel van der stat viel neder, ende inder eertbevinghe sijn seven dusent menschen name verslaghen, ende die ander sijn in vresen ghesent ende gaven Gode des hemels die ere.

Dat ijrste we is en wech geghaen ende dat ander sal haestelike comen.

Ende die sevende enghel blies mitter bazunen ende grote stemmen sijnre gheworden, segghende in den hemel: Deser werlt rijc is gheworden ons Heren ende sijns Cristi, ende hi sal waerlic in die werlde der werelde regniren. Ende die vier ende twintich oelde die in den aensichte Godes in haren setelen sitten, die vielen op haer aensichte ende anebeden Gode ende seyden: O Here almechtich God, die daer biste ende waerste ende wesen salste, wy dancken dy, wanttu ontfanghen hebste dijn grote moghentheyt ende hebste gheregniert. Ende dat volc is verbolghen, ende dijn toern is toe ghecomen ende die tijt der doder gheordelt toe waerden ende loen toe gheven dinen knechten den propheten ende den hilghen ende den cleynen ende den groten die dynen naem ontsien, ende die ghene toe verdeluwen, die de eerde verdervet hebben.

Ende die tempel Godes in den hemel is op gheloken ende die archa des testaments is ghesien in sinen tempel, ende het ghescieden blixene ende stemme ende eertbevinghe ende groet haghel.