Basiorum Liber

[p. 28]

Basivm XVIII

Cum labra nostrae cerneret Puellae,
Inclusa circo candida coronae
Ut si quis ornet, arte curiosa,
Corallinis eburna signa baccis,
Flevisse fertur Cypris, & gemendo
Lascivienteis convocasse Amores,
Et quid invat, dixisse, purpuratis
Vicisse in Ida Palladem labellis,
Et pronubam magni Iovis sororem,
Sub arbitro pastore? cum Neaera
Haec antecellat arbitro Poeta?
At vos furentes ite in hunc poetam,
Et dira plenis tela de pharetris
In illius medullulas tenellas,
Pectusque per iecurque per iocosum,
Distringite acres perstrepente cornu.
At illa nullo pertepescat igne,
Sed tacta pectus plumbea sagitta,
Torpescat imas congelata venas.
Evenit, imis uror in medullis,
Et torrido iecur liquescit igne:
Tu fulta pectus asperis pruinis
Et caute, qualeis aut maris sicani,
Aut Adriae unda tundit aestuosa,
Secura ludis impotentem amantem
Ingrata, propter ista labra rubra

[p. 29]

 

Laudata plector, heu, misella, nescis,

 

Cur oderis: nec ira quid deorum

 

Effrena possit, & furor Diones.

 

Duros remitte, mollicella, fastus:

 

Istoque dignos ore fume mores:

 

Et, quae meorum caussa sunt dolorum,

 

Mellita labris necte labra nostris:

 

Haurire possis ut mei pusillum

 

Praecordijs ex intimis veneni,

 

Et mutuis languere victa flammis!

 

At nec deos, nec tu time Dionen:

 

Formosa divis imperat puella.