Basiorum Liber

[p. 30]

Basivm XIX

Mellilegae volucres, quid adhuc thyma cana, rosasque

Et succum vernae nectareum violae

Lingitis? aut florem late spirantis anethi?

Omnes ad Dominae labra venite meae.

Illa rosas spirant omneis, thymaque omnia sola,

Et succum vernae nectarum violae:

Inde procul dulces aura funduntur anethi,

Narcissi veris illa madent lachrymis,

Oebalijque madent iuvenis fragrante cruore,

Qualis uterque liquor, cum cecidisset, erat,

Nectareque aetherio medicatus, & aëre puro,

Impleret fetu versicolore solum.

Sed me, iure meo libantem, mellea labra,

Ingratae socium ne prohibete favis.

Non etiam totas avidae distendite cellas,

Arescant Dominae ne semel ora meae,

Basiaque impressans siccis sitientia labris,

Garrulus indicij triste feram precium.

Heu, non et stimulis compungite molle labellum:

Ex oculis stimulos vibrat & illa pareis.

Credite, non ullum patietur vulnus inulctum:

Leniter innocuae mella legatis apes.