Dungru worku broko a faja gi mi: wan fresko mamanten
A ségotro e brétibréti nanga den wetweti dagublattrompeti na a sékanti.
Na mindri a pratiprati fu wan griki en bari wan tra doifi e froiti neleki na wan brekri froiti de na en mofo. Dan srefi a singi fu a orjon moi tiri, awinsi na a wan fasi a e ari en gwe na loktu orjón... orjón... orjón... a blaka trupu fu en opofré safri.
Mi de na wintisé nomo now, safu prépré fu a safu mamantenson.
A kanal na wan donsu séri fu frafra sekseki.
A bigin waran now. A son bigin gosa fu den dré kundudoti nanga a santi.
Na abrasé na a séskin fu a hédan - di busi agen nanga hé sankoka na en baka - weti nanga ròse bromki na ipi so fu tu dri meter hé marki densrefi. Geri de na ini tu. A gersi wan boketi fu fesa wan marki fu bromki di poti ensrefi dape e pristeri.
A srio di ben de na mi baka opo gaw kon moro na mi sé na wan telefonlin e srapu en sten.
Wan tingifowru e balansi e kon e balansi e go alasé na ini a loktu, alasé a de, ju kan si en sosé, dan datisé, dan na mi baka.
Mi bukundu dipi, luku na gron. Pe ala den ensekte de di ben e lonwaka esrede bakadina so na tapu den grasi-ede, den figifutuwiwiri, den gadodede? Den broin ensekte, den gowtuman, den penipeni weti-broin? Den blakablaw waswasi di e sekseki den bakasé taki a gersi den e suku blo den e boro na ini a doti a priti fu den kundudoti alajuru? Pe den de? Mi no si nowan.
Aji, ma toku wan grun-gowtuman, ma na fu wan sjatu momenti nomo. Ma a no leki esredebakadina di den swaluw ben e ori skoro na ini fré, fu pontu go na pontu, pisi go na pisi. presi go na presi, uku go na uku, den ben e ari lin, fringi densrefi, séri kon baka, iti densrefi, gwe baka.
Auteursrechtelijk beschermd